గాంధీనగర్: గుజరాత్ యాంటీ టెర్రరిజం స్క్వాడ్ (ఎటీఎస్), నార్కోటిక్స్ కంట్రోల్ బ్యూరో (ఎన్ సీబీ) పోర్‌బందర్ సముద్రంలో 700 కిలోల కంటే ఎక్కువ డ్రగ్స్‌ స్వాధీనం చేసుకున్నట్లు అధికారులు శుక్రవారం మీడియాకు తెలిపారు. గురువారం అర్థరాత్రి ప్రారంభమైన జాయింట్ ఆపరేషన్‌లో భారత నౌకాదళం కూడా పాల్గొంది. ఇరాన్‌కు చెందిన బోటులో డ్రగ్స్‌ను స్మగ్లింగ్ చేస్తున్నారు. తమను ఇరానియన్లుగా చెప్పుకున్న ఎనిమిది మంది విదేశీయులను అదుపులోకి తీసుకున్నారు. ఈ ఏడాది సముద్రంలో నావికాదళం చేపట్టిన రెండవ అతిపెద్ద విజయవంతమైన కోఆర్డినేటెడ్ యాంటీ నార్కోటిక్స్ ఆపరేషన్ ఇది.

గుజరాత్‌లో నాలుగేళ్లలో 87,000 కిలోల డ్రగ్స్‌ స్వాధీనం

ఆఫ్ఘనిస్తాన్ నుండి మాదకద్రవ్యాల రవాణా కేంద్రమైన పాకిస్తాన్‌కు సమీపంలో ఉండటంతో భారత్ లోకి మాదకద్రవ్యాల అక్రమ రవాణాకు హాట్‌స్పాట్‌గా గుజరాత్ తీరం ఉంది. గత నాలుగేళ్లలో రాష్ట్రంలో రూ.9,600 కోట్ల విలువైన 87,000 కిలోలకు పైగా డ్రగ్స్ పట్టుబడ్డాయని గుజరాత్ మంత్రి హర్ష్ సంఘ్వీ తెలిపారు. ఈ కేసుల్లో 2,600 మందిని అరెస్టు చేసినట్లు జూన్‌లో తెలిపారు. 2024 ప్రథమార్థంలో, మాదకద్రవ్యాలకు సంబంధించిన కార్యకలాపాలు గుజరాత్‌లో 353 మందిని అరెస్టు చేసి 251 కేసులను నమోదు చేసినట్లు మంత్రి సంఘ్వీ వెల్లడించారు.