మంకీపాక్స్ అనేది ఓ వైరల్ ఇన్ఫెక్షన్. ఇది ముఖ్యంగా అఫ్రికా ఖండంలో కనిపించేది. కానీ ఇటీవల ప్రపంచవ్యాప్తంగా వ్యాపిస్తోంది. 1958లో తొలిసారిగా కోతులలో కనిపించిన ఈ వైరస్, 2022 తరువాత ప్రపంచవ్యాప్తంగా పెరుగుదలను చూసింది.  2024లో కూడా ఈ వ్యాధి కొనసాగుతోంది.ఈ నేపథ్యంలో ప్రజల్లో ఆందోళన ఇంకా కొనసాగుతోంది. మంకీపాక్స్ లక్షణాలు సాధారణంగా జ్వరంతో ప్రారంభమవుతాయి, దాంతో పాటు తలనొప్పి, కండరాల నొప్పి, అలసట, ఉబ్బిన లింఫ్ నోడ్స్ వంటివి ఉంటాయి. జ్వరం వచ్చిన కొన్ని రోజుల తరువాత రోగులకు చర్మంపై చిట్లిన దద్దుర్లు కనిపిస్తాయి. ఇవి ముఖం, చేతులు, పాదాలు, శరీరంలోని ఇతర భాగాలలో ఉంటాయి.

ఈ దద్దుర్లు మాసిపోవడానికి సుమారు 2  4 వారాలు పడుతుంది.మంకీపాక్స్ వ్యాధి ముఖ్యంగా సంక్రమణ ద్వారా వ్యాపిస్తుంది. వైరస్ సంక్రమించిన జంతువుల నుండి, లేదా ఒక వ్యక్తి నుండి మరొక వ్యక్తికి నేరుగా, అలాగే బట్టలు, చీపుర్లు, ఇతర వస్తువుల ద్వారా కూడా వ్యాపిస్తుంది. వైరస్ సోకిన వ్యక్తితో లైంగిక సంపర్కం వల్ల, సమీపంగా ఉండటం వల్ల మంకీపాక్స్ సంక్రమించవచ్చు. 2023లో ప్రపంచవ్యాప్తం గా మంకీపాక్స్ కేసుల సం ఖ్య సుమారు 90,000గా నమోదయ్యింది. భారతదేశంలో కూడా ఆ ఏడాది 1,200 కి పైగా కేసులు నమోదయ్యాయి. 2024 ప్రారంభం నాటికి గ్లోబల్ కేసుల సంఖ్య 100,000కి చేరుకుంది. అయితే మరణాల రేటు 4-5 శాతానికి తగ్గింది.

ఈ సంవత్సరంలో దేశంలో కేసుల సంఖ్య దాదాపు 1,500 కి చేరుకుంది. మంకీపాక్స్‌కు నిర్దిష్టమైన చికిత్స లేకపోయినా, లక్షణాలను తగ్గించడానికి సహాయక చికిత్సలు అందుబాటులో ఉన్నాయి. మంకీపాక్స్‌ను నివారించడానికి ప్రధానంగా వ్యాధి వ్యాప్తిని అడ్డుకోవడం ముఖ్యం. వ్యాధి పట్ల జాగ్రత్తలు, నిబంధనలు పాటించడం, అలాగే టీకా అందుబాటులో ఉన్నప్పుడు తీసుకోవడం అనేది ముఖ్యమైన సూత్రం.ఈ వ్యాధి ప్రపంచవ్యాప్తంగా ప్రజలలో ఒక విపరీతమైన భయాన్ని కలిగిస్తోంది.

ముఖ్యంగా కోవిడ్-19 మహమ్మారి అనంతరం, ప్రజలు కొత్త వైరస్‌లపట్ల చాలా అప్రమత్తంగా ఉన్నారు. మంకీపాక్స్ వ్యాధి ప్రబలుతున్న నేపథ్యంలో ప్రభుత్వం, ఆరోగ్య సంస్థలు ప్రజలను జాగ్రత్తగా ఉండమని హెచ్చరిస్తున్నాయి. దీన్ని నియంత్రించడానికి తగిన చర్యలు తీసుకుంటున్నారు. ప్రజలు అనవసరంగా భయపడకుండా, మంకీపాక్స్‌పై సరైన అవగాహన కలిగి ఉండటం ముఖ్యమని నిపుణులు సలహా ఇస్తున్నారు. సరైన నివారణ చర్యలు తీసుకుంటే, ఈ వ్యాధి వ్యాప్తిని నియంత్రించవచ్చు.

డా. చిట్యాల రవీందర్