వాషింగ్టన్: అమెరికా అధ్యక్ష ఎన్నికల్లో రిపబ్లికన్ పార్టీ నేత డోనాల్డ్ ట్రంప్ జయభేరి మోగించారు. అధ్యక్ష ఎన్నికల్లో గెలుపుకు కావాల్సిన మ్యాజిక్ ఫిగర్(270) ను ట్రంప్ దాటేశాడు. విస్కాన్సిన్ గెలుపుతో ఆయన ఈ మ్యాజిక్ ఫిగర్ క్రాస్ చేశాడు. దీంతో కమాలాహరిస్ పై డొనాల్డ్ ట్రంప్ విజయం సాధించి రెండోసారి అగ్రరాజ్యం అమెరికా అధ్యక్ష బాధ్యతలు చేపట్టనున్నారు. ఈ విజయంతో అమెరికా 47వ అధ్యక్షుడిగా ట్రంప్ బాధ్యతలు చేపట్టనున్నారు. ట్రంప్ విజయం సాధించడంతో పలు దేశాల నేతలు శుభాకాంక్షలు తెలిపారు. ప్రధాని నరేంద్ర మోదీ హృదయపూర్వక అభినందనలు మిత్రమా అని ఎక్స్ వేదికగా శుభాకాంక్షలు తెలిపారు. 

అటు ట్రంప్ విజయంపై చైనా స్పందించింది. అమెరికా ప్రజల నిర్ణయాన్ని గౌరవిస్తామని వెల్లడించింది. అమెరికాతో శాంతియుత సంబంధాలు కొనసాగిస్తామని ఆశాభావం వ్యక్తం చేసింది. పరస్పరం గౌరవం, సహకారంతో ముందుకెళ్తామని ప్రకటించింది. ట్రంప్ పేరు నేరుగా ప్రస్తావించకుండా.. ఎన్నికల ఫలితాలపై చైనా స్పందించింది.  అమెరికా అధ్యక్ష ఎన్నికల్లో జయభేరి మోగించిన డొనాల్డ్ ట్రంప్ కు ఆంధ్రప్రదేశ్ ముఖ్యమంత్రి నారా చంద్రబాబు నాయుడు అభినందనలు తెలిపారు.