గతంలో ‘మత్తు వదలరా’ మూవీ అందరి ప్రసంశలందుకుంది. ఇప్పుడు అదే చిత్రబృందం మరోమారు సీక్వెల్‌తో వస్తోంది. ‘మత్తు వదలారా2’ పేరుతో తెరకెక్కుతున్న ఈ సినిమాలో శ్రీసింహ కోడూరి లీడ్ రోల్‌లో నటిస్తుండగా, సత్య అతని స్నేహితుడిగా కీలక పాత్ర పోషిస్తున్నారు. రితేశ్ రానా దర్శకత్వం వహిస్తున్న ఈ చిత్రాన్ని చిరంజీవి, హేమలత పెదమల్లు నిర్మిస్తున్నారు. సోమవారం శ్రీకృష్ణ జన్మాష్టమి సందర్భంగా ఈ సినిమాను ప్రకటిస్తూ రెండు పోస్టర్ల ద్వారా విచిత్రమైన ప్రపంచాన్ని పరిచయం చేశారు మేకర్స్.  ఈ సీక్వెల్ దాని ప్రీక్వెల్ కంటే మరింత ఎక్సయిటింగ్‌గా ఉంటుందని పోస్టర్ సూచిస్తోంది.

సీక్వెల్‌లో క్రైమ్ ఎలిమెంట్‌లను సూచించే మరో పోస్టర్‌ను కూడా మేకర్స్ విడుదల చేశారు. సెప్టెంబర్ 13న ఈ చిత్రాన్ని విడుదల చేస్తున్నట్టు కూడా వారు వెల్లడించారు. హీరోయిన్ ఫరియా అబ్దుల్లా భాగమైన ఈ సీక్వెల్‌లో సునీల్, వెన్నెల కిషోర్, అజయ్, రోహిణి, రాజా చెంబోలు, ఝాన్సీ, శ్రీనివాస్ రెడ్డి, గుండు సుదర్శన్ ముఖ్యమైన పాత్రల్లో నటిస్తున్నారు. పార్ట్1లో డెలివరీ ఏజెంట్లుగా సందడి చేసిన బాబు (శ్రీసింహ), యేసు (సత్య) ఈసారి స్పెషల్ ఏజెంట్లుగా కనిపిస్తున్నారు. ఈ స్పెషల్ ఏజెంట్లు స్పెషల్ టాస్క్‌లు, ట్విస్టులు, ఎంటర్ టైన్‌మెంట్‌తో వినోదం పంచునున్నారు. ఈ చిత్రానికి సంగీతం: కాల భైరవ; సినిమాటోగ్రఫీ: సురేశ్ సారంగం.