హైదరాబాద్,(విజయక్రాంతి): సినీ నిర్మాత, తెలంగాణ ఎఫ్డీసీ ఛైర్మన్ దిల్ రాజు(Telangana FDC Chairman Dil Raju) మంగళవారం బషీర్‌బాగ్‌లోని ఆయకార్ భవన్‌లో ఆదాయపు పన్ను శాఖ (Income Tax Department) అధికారుల ఎదుట హాజరయ్యారు. జూబ్లీహిల్స్‌లోని రాజు కార్యాలయం, ఇంట్లో అధికారులు గత నెల 21వ తేదీన నాలుగు రోజులకు పైగా దాడులు నిర్వహించిన సంగతీ తెలిసిందే. ఈ క్రమంలోనే ఆయనకు సంబంధించిన పత్రాలను తనిఖీ చేసినట్లు ఆయన వెల్లడించారు. తర్వాత, ఐటీ అధికారులు సినీ పరిశ్రమలో దిల్ రాజు వ్యాపారానికి సంబంధించిన మరిన్ని విషయాలు తెలుసుకునేందుకు పత్రాలు, బ్యాలెన్స్ షీట్‌లతో తమ ముందు హాజరు కావాలని నోటీసులు కూడా జారీ చేశారు. 

తన నిర్మాణ సంస్థ శ్రీ వెంకటేశ్వర క్రియేషన్స్ (Sri Venkateswara Creations) ద్వారా సినిమాలు నిర్మించడం, సినిమా ప్రదర్శనకారుడిగా వచ్చిన అన్ని వివరాలు, మూవీ విడుదల తర్వాత వచ్చే లాభాల వ్యవహారంపై ఐటీ అధికారులు ఆరా తీయనున్నారు. ఐటీ అధికారుల సలహా మేరకు, తెలంగాణ ఫిల్మ్ డెవలప్‌మెంట్ కార్పొరేషన్ చైర్మన్ రాజు, సంబంధిత పత్రాలను పరిశీలించడానికి అధికారుల ముందు హాజరయ్యారు. దిల్ రాజు సంక్రాంతి సందర్భంగా భారీ బడ్జెట్ సినిమాలను విడుదల చేసిన విషయం తెలిసిందే. ఈ నేపథ్యంలోనే ఆయనతో పాటు పలువురు నిర్మాత, దర్శకుడు ఇళ్లలో కూడా ఐటీ సోదాలు నిర్వహించింది.