కూకట్‌పల్లి (విజయక్రాంతి): ఆలయం చుట్టూ ప్రదక్షిణలు చేస్తున్న ఓ వ్యక్తి గుండెపోటుతో మృతి చెందిన సంఘటన కెపిహెచ్బి పోలీస్ స్టేషన్ పరిధిలో సోమవారం చోటు చేసుకుంది. పోలీసులు తెలిపిన వివరాల ప్రకారం.. కానాంపల్లి విష్ణువర్ధన్ (31) గత సంవత్సర కాలంగా కెపిహెచ్బి కాలనీ రోడ్ నెంబర్ 1 లోని అమ్మ పీజీ హాస్టల్లో ఉంటూ ప్రైవేటు ఉద్యోగం చేస్తున్నాడు. ప్రతిరోజు గుడికి వెళ్లే అలవాటు ఉంది. ఈ క్రమంలోనే సోమవారం ఉదయం టెంపుల్ బస్ స్టాప్ సమీపంలోని ఆంజనేయస్వామి దేవాలయానికి వెళ్ళాడు. ప్రదక్షిణలు చేస్తుండగా ఒక్కసారిగా కుప్ప కూలిపోయాడు. గమనించిన తోటి భక్తులు సిపిఆర్ చేసి ఆస్పత్రికి తరలించే ప్రయత్నం చేశారు. అప్పటికే అతను మృతిచెందినట్లు పోలీసులు పేర్కొన్నారు. ఘటన స్థలానికి చేరుకున్న పోలీసులు మృతదేహాన్ని పరిశీలించి మృతుడి సోదరుడు ఇచ్చిన ఫిర్యాదు మేరకు కేసు నమోదు చేసుకొని దర్యాప్తు చేస్తున్నారు.