ధగధగలాడే అందాల నిధిని ధరించిన లక్ష్మీదేవి అవతారం అలా నడిచి వస్తున్నట్టు మైమరిపింపజేస్తున్న ఈ చిత్రంలోని తారను గుర్తు పట్టారా? బంగారు వర్ణపు చీరలో, నిండైన నగలతో మెరిసిపోతూ తనదైన అందంతో మాయ చేస్తున్న ఈ భామ ఎవరో కాదు నిధి అగర్వాల్! పవన్ కల్యాణ్ కథానాయకుడిగా నటిస్తున్న చిత్రం ‘హరిహర వీరమల్లు’లోని స్టిల్ ఇది. ఈ సినిమాలో నిధి కథానాయికగా నటిస్తోంది. శనివారం ఆమె పుట్టిన రోజును పురస్కరించుకొని ఇలా ప్రత్యేక పోస్టర్‌తో నిధికి శుభాకాంక్షలు తెలిపింది చిత్రబృందం. ఈ మూవీ రెగ్యులర్ షూటింగ్ కొంత విరామం తర్వాత ఆగస్టు 14 నుంచి తిరిగి ప్రారంభమైన విషయం విదితమే.

ప్రస్తుతం యాక్షన్ దర్శకుడు స్టంట్ సిల్వ పర్యవేక్షణలో భారీ యుద్ధ సన్నివేశాన్ని చిత్రీకరిస్తున్నారు. ఇప్పటివరకు చేయని చారిత్రాత్మక యోధుడి పాత్రలో పవన్.. అణగారిన వర్గాల కోసం, పాలకుల దౌర్జన్యాలకు వ్యతిరేకంగా పోరాడే ఒక యోధుడిగా కనిపించనున్నారు. ఈ చిత్రంలో బాలీవుడ్ నటులు బాబీ డియోల్, అనుపమ్ ఖేర్ సహా చాలా మంది ప్రముఖ నటీనటులు భాగమయ్యారు. త్వరలో ప్రపంచ వ్యాప్తంగా తెలుగు, హిందీ, తమిళ, మలయాళ భాషల్లో విడుదల కానుందీ చిత్రం.