ఎన్టీఆర్ టైటిల్ పాత్రలో నటిస్తున్న భారీ చిత్రం ‘దేవర’ ఆరంభం నుంచీ సంచలనాలను సృష్టిస్తోంది. రెండు భాగాలుగా రూపొందుతున్న ఈ మూవీ తొలిభాగం ప్రపంచ వ్యాప్తంగా సెప్టెంబర్ 27న తెలుగు, హిందీ, తమిళ, కన్నడ, మలయాళ భాషల్లో రిలీజ్ కానుంది. ఈ నేపథ్యంలో దేవర పార్ట్ 1 ప్రీమియర్ షోను సెప్టెంబర్ 26 సాయంత్రం ఆరున్నర గంటలకు ‘బియాండ్ ఫెస్ట్’లో హాలీవుడ్, లాస్ ఏంజిల్స్‌లోని ఐకానిక్ ఈజిప్షియన్ థియేటర్‌లో ప్రదర్శించనున్నారు.

బియాండ్ ఫెస్ట్.. గొప్ప చరిత్ర ఉన్న ప్రతిష్టాత్మక సినిమా వేదిక! ఇక్కడ ప్రీమియర్ కాబోతున్న తొలి ఇండియన్ సినిమాగా ‘దేవర’ అరుదైన ఘనతను సొంతం చేసుకుంది. ఈ ఈవెంట్‌కు హాలీ వుడ్‌కు చెందిన ప్రముఖులు హాజరు కానున్నారు. ఇలాంటి వేదికలో రెడ్ కార్పెట్ ఈవెంట్ జరగటం గొప్ప విషయమే.

జాన్వీ కపూర్ హీరోయిన్‌గా నటిస్తున్న ఈ చిత్రంలో బాలీవుడ్ స్టార్ సైఫ్ అలీఖాన్ కీలక పాత్ర పోషిస్తున్న విషయం తెలిసిందే. ప్రకాశ్‌రాజ్, శ్రీకాంత్, షైన్ టామ్ చాకో, అజయ్, గెటప్ శ్రీను తదితరులు ఇతర కీలక పాత్రల్లో నటిస్తున్న ఈ సినిమాను కొరటాల శివ దర్శకత్వంలో ఎన్టీఆర్ ఆర్ట్స్, యువ సుధ ఆర్ట్స్ పతాకాలపై మిక్కిలినేని సుధాకర్, హరికృష్ణ కె నిర్మిస్తున్నారు.