నందమూరి బాలకృష్ణ, బాబీ కొల్లి కాంబోలో వస్తున్న చిత్రం ‘డాకు మహారాజ్’. శ్రీకర స్టూడియోస్ సమర్పణలో సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్ పతాకాలపై సూర్యదేవర నాగవంశీ, సాయి సౌజన్య భారీ బడ్జెట్‌తో ఈ సినిమాను నిర్మిస్తున్నారు. తమన్ సంగీతం అందిస్తున్న ఈ చిత్రంలో శ్రద్ధా శ్రీనాథ్, ప్రగ్యా జైస్వాల్ కథానాయికలుగా నటిస్తున్నారు. సంక్రాంతి కానుకగా జనవరి 12న ఈ చిత్రం ఏక కాలంలో మూడు భాషల్లో విడుదల కానుంది. ఈ క్రమంలోనే నటి శ్రద్ధా శ్రీనాథ్ సినిమాకు సంబంధించిన ఆసక్తికర విషయాలను మీడియాతో పంచుకున్నారు. 

‘డాకు మహారాజ్’ సినిమాలో నటించడం ఎలా ఉంది?

నేను ఇప్పటివరకూ కొన్ని విభిన్న సినిమాలు చేశాను. అయితే ఈ చిత్రం మాత్రం ఒక పూర్తి ప్యాకేజ్‌లా ఉంటుంది. ఇలాంటి సినిమా నేనిప్పటి వరకూ చేయలేదు. కామెడీ, యాక్షన్, ఎమోషన్ అన్నీ ఉంటాయి. పైగా బాలకృష్ణ గారి సినిమా అంటే ఎక్కువ మంది ప్రేక్షకులకు నా ప్రతిభను చూపించే అవకాశం ఉంటుంది.

సెట్స్‌లో బాలకృష్ణ ఎలా ఉంటారు?

ఎన్నో ఏళ్ల నుంచి సినీ పరిశ్రమలో ఉన్నాను. నేనొక బిగ్ స్టార్‌ని అనే అహం బాలకృష్ణ గారిలో కొంచెం కూడా ఉండదు. సెట్స్‌లో అందరితో సరదాగా ఉంటారు. తనకంటే చిన్నా పెద్దా అని చూడకుండా దర్శకుడికి ఆయన ఎంతో గౌరవం ఇస్తారు. సినిమా కోసం దర్శకుడు ఏం చెప్తే అది చేయడానికి ఎప్పుడూ సిద్ధంగా ఉంటారు.

మీ పాత్ర ఎలా ఉండబోతుంది?

నా పాత్ర పేరు నందిని. చాలా సాఫ్ట్‌గా ఉంటుంది. ఎంతో ఓపిక ఉంటుంది. అదే సమయంలో ఎప్పుడు మాట్లాడాలో స్పష్టంగా తెలుసు. నా పాత్రలో ఎంతో డెప్త్ ఉంటుంది. 

ఈ సినిమా ప్రయాణంలో మీకు ఛాలెంజింగ్‌గా అనిపించిందేంటి?

నటిగా ఈ సినిమా నుంచి ఎంతో నేర్చుకున్నాను. ముఖ్యంగా ఇందులో డైలాగ్‌లు కరెక్ట్ మెజర్‌లో ఉంటాయి. డబ్బింగ్ చెప్పడానికి ఎక్కువ సమయం తీసుకున్నాను. ప్రతి డైలాగ్ మీద ఎంతో కేర్ తీసుకొని డబ్బింగ్ చెప్పించారు.

మీ పాత్ర పరంగా ‘జెర్సీ’, ‘డాకు మహారాజ్’ సినిమాల్లో ఏది బెస్ట్ అంటే ఏం చెప్తారు?

రెండూ వేటికవే ప్రత్యేకం. ‘జెర్సీ’లో నేను పో షించిన సారా పాత్ర నా మనసుకు బాగా నచ్చిం ది. ప్రేక్షకులు కూడా ఆదరించారు. ఇప్పుడు ‘డాకు మహారాజ్’లోని నందిని పాత్ర కూడా ప్రేక్షకులకు ఆ స్థాయిలో చేరువవుతుందనే నమ్మ కం ఉంది. 

దర్శకుడు బాబీ గురించి చెప్పండి.. 

బాబీ గారు ప్రతిభగల దర్శకుడు. సినిమా పట్ల ఆయనకు ఎంతో ప్యాషన్ ఉంది. అలాగే, బాబీ గారిలో మంచి నటుడు కూడా ఉన్నాడు. అద్భుతమైన సూచనలు ఇస్తూ, నటీనటుల నుంచి మంచి నటనను రాబట్టుకుంటారు.

సితార ఎంటర్‌టైన్‌మెంట్స్ గురించి.. 

సితార ఎంటర్‌టైన్‌మెంట్స్ నాకు జెర్సీ వంటి మెమరబుల్ ఫిల్మ్‌ని ఇచ్చింది. నాపై నమ్మకం ఉంచి, ఇప్పుడు ‘డాకు మహారాజ్’లో మరో మంచి పాత్ర ఇవ్వడం ఎంతో ఆనందంగా ఉంది. సితార ఎన్నో మంచి మంచి సినిమాలను నిర్మిస్తూ ఉంటుంది. అలాంటి బ్యానర్‌లో సినిమా చేయడం ఎప్పుడూ గౌరవంగానే భావిస్తాను.

మీకు ఎలాంటి సినిమాలు, పాత్రలు చేయాలని ఉంది?

నాకు అన్ని రకాల సినిమా లూ చేయాలని ఉంది.   నిజ జీవితానికి దగ్గరగా ఉండే పాత్రలు పోషించడానికి ఎక్కువగా ఇష్టపడ తాను.