హైదరాబాద్: రంగారెడ్డి జిల్లా శంషాబాద్ మండలం పెద్ద గోల్కొండ వద్ద ఓఆర్ఆర్ పై భారీగా గంజాయి పట్టుబడింది. గచ్చిబౌలి వెళ్తున్న కంటైనర్ లో 800 కిలోల గంజాయిని పోలీసులు స్వాధీనం చేసుకున్నారు. ఒడిశా నుంచి గంజాయి తరలిస్తున్నట్లు ఎస్ వోటీ పోలీసులు గుర్తించారు. శనివారం రాత్రి పెద్ద అంబర్‌పేట్‌లోని ఔటర్‌ రింగ్‌ రోడ్డు (ఓఆర్‌ఆర్‌)లో స్మగ్లర్లు ఒడిశా నుంచి నిషిద్ధ వస్తువులు తీసుకువస్తుండగా కంటైనర్‌ను పోలీసులు అడ్డుకున్నారు. సైబరాబాద్‌ పోలీసుల ప్రత్యేక ఆపరేషన్‌ బృందం (ఎస్‌ఓటీ) కంటైనర్‌ తలుపులు తెరిచి చూడగా ముందు వరుసలో రసాయనాలు నింపిన కొన్ని డ్రమ్ములు కనిపించాయి. ఎస్‌ఓటీ బృందం వాటిని పరిశీలించగా, గంజాయి సాచెట్‌లతో నిండిన బ్లూ కలర్ డ్రమ్ములను గుర్తించారు. పోలీసు బృందం వెంటనే కంటైనర్ డ్రైవర్‌ను అదుపులోకి తీసుకుంది. డ్రైవర్‌ను విచారించిన తర్వాతే గంజాయి స్మగ్లింగ్‌పై మరిన్ని వివరాలు తెలుస్తాయని పోలీసు అధికారులు తెలిపారు.