ధనశ్రీ.. భారత క్రికెట్ జట్టు ఆటగాడు, ఆర్సీబీ మాజీ క్రికెటర్ యజువేంద్ర చాహల్ భార్య. ఇప్పుడీమె చిత్ర పరిశ్రమలో అడుగుపెడుతోంది. అది కూడా ఓ తెలుగు సినిమా ద్వారా తెరంగేట్రం చేస్తుండటం చెప్పుకోదగ్గ విషయం. సోషల్ మీడియా ఇన్‌ఫ్లుయెన్సర్‌గా పాపులర్ అయిన ధనశ్రీ అద్భుతమైన నృత్యకారిణి కూడా. తన డ్యాన్స్ వీడియోలను ఇన్‌స్టాగ్రామ్‌లో షేర్ చేయడమే కాక కొన్ని డ్యాన్స్ రియాల్టీ షోల్లోనూ పాల్గొన్నారామె.

డ్యాన్స్ ప్రధాన కథాంశంగా రూపొందుతున్న చిత్రంలో ధనశ్రీ హీరోయిన్‌గా ఎంపికయ్యింది. ఈ సినిమాలో ప్రముఖ డ్యాన్స్ మాస్టర్ యష్ హీరోగా నటిస్తున్నారు. ఇప్పటికే కొంత భాగం షూటింగ్ కూడా పూర్తి చేసినట్టు సమాచారం. కొన్ని సన్నివేశాలను ముంబైలో చిత్రీకరించిన మూవీ టీమ్ మిగతా భాగాన్ని హైదరాబాద్‌లో షూట్ చేయనుందని టాక్.

దిల్ రాజు ప్రొడక్షన్స్ బ్యానర్‌పై హర్షిత్‌రెడ్డి, హన్సితారెడ్డి నిర్మిస్తున్న ఈ చిత్రానికి శశికుమార్ ముత్తులూరి దర్శకుడు. ఈ సినిమాలో కథానాయిక కోసం భరతనాట్యం నుంచి ఆధునిక డాన్సుల వరకు పలు నృత్యాంశాల్లో ప్రావీణ్యం ఉన్న నర్తకిని ఎంపిక చేసే క్రమంలో చిత్రబృందానికి ధనశ్రీ దొరికారట.

చాలా మందిని ఆడిషన్స్ నిర్వహించిన తర్వాత ధనశ్రీని అడిగారట. ధనశ్రీకి కూడా ఆ పాత్ర నచ్చటంతో ఓకే చెప్పేశారట. మరో ఫీమేల్ లీడ్ కోసం సీరత్ కపూర్ ఎంపికైనట్టు తెలుస్తోంది. అదీగాక ఓ మలయాళ నటి కూడా ఈ చిత్రంలో కనిపించనుందని భోగట్టా.