హైదరాబాద్: తెలంగాణ శాసనమండలి ఎన్నికలకు సంబంధించి రెండు ఉపాధ్యాయ, ఒక గ్రాడ్యుయేట్ నియోజకవర్గానికి జరిగిన ఓట్ల లెక్కింపు(MLC election results) సోమవారం ప్రశాంతంగా జరుగుతోంది. మెదక్-నిజామాబాద్-ఆదిలాబాద్-కరీంనగర్ గ్రాడ్యుయేట్ నియోజకవర్గం, మెదక్-నిజామాబాద్-ఆదిలాబాద్-కరీంనగర్ ఉపాధ్యాయ నియోజకవర్గం, వరంగల్-ఖమ్మం-నల్గొండ ఓట్ల లెక్కింపు ఉదయం 8 గంటలకు ప్రారంభమైంది. ఈ స్థానాలకు ఫిబ్రవరి 27న బ్యాలెట్ పేపర్ ద్వారా పోలింగ్ జరిగింది. లెక్కింపు ప్రక్రియకు రెండు నుండి మూడు రోజులు పట్టే అవకాశం ఉంది. ఎన్నికల సంఘం అధికారులు అభ్యర్థులు లేదా వారి ఏజెంట్ల సమక్షంలో స్ట్రాంగ్ రూమ్‌లను తెరిచారు.

మెదక్-నిజామాబాద్-ఆదిలాబాద్-కరీంనగర్ గ్రాడ్యుయేట్, ఉపాధ్యాయ నియోజకవర్గాలకు సంబంధించి, కరీంనగర్‌లోని అంబేద్కర్ ఇండోర్ స్టేడియంలో లెక్కింపు ప్రారంభమైంది. వరంగల్-ఖమ్మం-నల్గొండ ఉపాధ్యాయ నియోజకవర్గం ఓట్ల లెక్కింపు నల్గొండలోని వేర్‌హౌసింగ్ కార్పొరేషన్ గోడౌన్‌లో జరుగుతోంది. మొదటి ప్రాధాన్యత ఓట్లలో 50 శాతం కంటే ఎక్కువ పోలైన అభ్యర్థులను ఎన్నికైనట్లు ప్రకటిస్తారు. మొదటి ప్రాధాన్యత ఓట్లలో విజేతలు లేకుంటే, రెండవ ప్రాధాన్యత ఓట్ల లెక్కింపు చేపడతారు. రెండు ఉపాధ్యాయ నియోజకవర్గాల్లో ఈ ప్రక్రియకు 36 గంటలు పట్టే అవకాశం ఉంది. గ్రాడ్యుయేట్ల నియోజకవర్గంలో మూడు రోజులు పట్టవచ్చు. మెదక్-నిజామాబాద్-ఆదిలాబాద్-కరీంనగర్ గ్రాడ్యుయేట్ల నియోజకవర్గంలో 70.4 శాతం పోలింగ్ నమోదైంది. మెదక్-నిజామాబాద్-ఆదిలాబాద్-కరీంనగర్ ఉపాధ్యాయ నియోజకవర్గంలో 91.9 శాతం పోలింగ్ నమోదు కాగా, వరంగల్-ఖమ్మం-నల్గొండ ఉపాధ్యాయ నియోజకవర్గంలో 93.55 శాతం పోలింగ్ నమోదైంది.

మెదక్-నిజామాబాద్-ఆదిలాబాద్-కరీంనగర్ గ్రాడ్యుయేట్ల నియోజకవర్గంలో మొత్తం 56 మంది అభ్యర్థులు బరిలో ఉన్నారు. భారత రాష్ట్ర సమితి (BRS) దూరంగా ఉండటంతో, ప్రధాన పోటీ అధికార కాంగ్రెస్ పార్, భారతీయ జనతా పార్టీ (BJP) మధ్య జరిగింది. 3,55,159 మంది గ్రాడ్యుయేట్లు ఓటు హక్కు వినియోగించుకున్నారు. ఉపాధ్యాయ విభాగాలకు ఎన్నికలు పార్టీ రహితంగా జరిగినప్పటికీ, బిజెపి రెండు విభాగాలలోనూ అభ్యర్థులను నిలబెట్టింది. మెదక్-నిజామాబాద్-ఆదిలాబాద్-కరీంనగర్ నియోజకవర్గంలో 15 మంది అభ్యర్థులు బరిలో ఉండగా, వరంగల్-ఖమ్మం-నల్గొండ నియోజకవర్గంలో 19 మంది అభ్యర్థులు పోటీ చేశారు.

మెదక్-నిజామాబాద్-ఆదిలాబాద్-కరీంనగర్ ఉపాధ్యాయ నియోజకవర్గంలో, వరంగల్-ఖమ్మం-నల్గొండ ఉపాధ్యాయ నియోజకవర్గంలో వరుసగా 27,088, 25,759 మంది ఓటర్లు ఉన్నారు. ప్రస్తుతం కాంగ్రెస్ సీనియర్ నాయకుడు మాజీ మంత్రి టి. జీవన్ రెడ్డి ప్రాతినిధ్యం వహిస్తున్న మెదక్-నిజామాబాద్-ఆదిలాబాద్-కరీంనగర్ గ్రాడ్యుయేట్ల నియోజకవర్గంలో కాంగ్రెస్, బిజెపి ప్రత్యక్ష పోరాటంలో ఉన్నాయి. కాంగ్రెస్ పార్టీ BRS నుండి అధికారాన్ని చేజిక్కించుకున్న అసెంబ్లీ ఎన్నికల తర్వాత దాదాపు 15 నెలల తర్వాత ఎమ్మెల్సీ ఎన్నికలు జరుగుతున్నందున రెండు జాతీయ పార్టీలకు హోరా హోరిగా పోటీ పడుతున్నాయి.

కాంగ్రెస్ పార్టీ వీ. నరేందర్ రెడ్డిని పోటీకి దింపింది. అతను బీజేపీకి చెందిన సీ. అంజి రెడ్డికి వ్యతిరేకంగా పోటీ చేస్తున్నాడు. గత సంవత్సరం ఈ సెగ్మెంట్‌లోని నాలుగు లోక్‌సభ స్థానాలను గెలుచుకున్న బీజేపీ, కాంగ్రెస్ నుండి ఈ స్థానాన్ని కైవసం చేసుకుంటామని నమ్మకంగా ఉంది. రెండు జాతీయ పార్టీల నాయకులు ఎన్నికల ప్రచారంలో చురుకుగా పాల్గొన్నారు.  రాష్ట్ర బీజేపీ అధ్యక్షుడు, కేంద్ర బొగ్గు, గనుల శాఖ మంత్రి కిషన్ రెడ్డి, కరీంనగర్ లోక్‌సభ నియోజకవర్గానికి ప్రాతినిధ్యం వహిస్తున్న కేంద్ర హోంశాఖ సహాయ మంత్రి బండి సంజయ్ కుమార్ ప్రచారానికి నాయకత్వం వహించారు. కాంగ్రెస్ తరపున, ముఖ్యమంత్రి రేవంత్ రెడ్డి మూడు బహిరంగ సభలలో ప్రసంగించారు. తెలంగాణ ప్రదేశ్ కాంగ్రెస్ కమిటీ (TPCC) అధ్యక్షుడు మహేష్ కుమార్ గౌడ్, ఇతర నాయకులు కూడా ప్రచారంలో పాల్గొన్నారు.