1. ఫేక్ ఫొటోలు, వీడియోలతో అందరినీ పక్కదారి పట్టించారు
2. ఉన్నవి లేనట్టు, లేనివి ఉన్నట్టుగా చిత్రీకరించి వైరల్ చేశారు..
3. ప్రజాస్వామ్య వ్యవస్థలకు ఏఐ సవాల్ విసురుతోంది..
4. ఏఐ ఫేక్ కంటెంట్.. కరోనా వైరస్‌ను మించిన మహమ్మారి
5. సైబర్ క్రైమ్ విభాగాన్ని బలోపేతం చేయాలి   
6. కంచ గచ్చిబౌలి భూములపై అధికారులతో సీఎం రేవంత్‌రెడ్డి సమీక్ష
7. ఫేక్ కంటెంట్‌పై విచారణకు ఆదేశించేలా కోర్టుకు విజ్ఞప్తి చేయాలని ఆదేశం

హైదరాబాద్, ఏప్రిల్ 5 (విజయక్రాంతి): వాస్తవాలు వెల్లడించేలోగా అబద్ధాలు సోషల్‌మీడియాలో జాతీయస్థాయిలో వైరల్ కావటం ప్రభుత్వానికి సవాల్‌గా మారిందని, హైదరాబాద్ యూనివర్సిటీ భూములను లాక్కున్నట్టుగా సోషల్ మీడియా నెట్‌వర్క్ కృత్రిమంగా వివాదం సృష్టించడంపై రాష్ట్రప్రభుత్వం ఆందోళన వ్యక్తంచేసింది. కంచ గచ్చిబౌలి భూములకు సంబంధించి కోర్టులో ఉన్న కేసులపై సీఎం రేవంత్‌రెడ్డి శనివారం సచివాలయంలో సమీక్ష నిర్వహించారు.

ఇందులో డిప్యూటీ సీఎం భట్టివిక్రమార్క, మంత్రులు సీతక్క, పొంగులేటి శ్రీనివాసరెడ్డి, ప్రభుత్వ ప్రధాన కార్యదర్శి శాంతికుమారి, డీజీపీ జితేందర్, పీసీసీఎఫ్‌ఆర్ ఎమ్ డోబ్రియాల్,  టీజీఐఐసీ ఎండీ విష్ణువర్ధన్‌రెడ్డి, సంబంధిత శాఖల అధికారులు పాల్గొన్నారు. 

ఇప్పుడే ఎందుకు వివాదాస్పదం..

కంచ గచ్చిబౌలిలోని సర్వే నెంబర్ 25లో ఉన్న భూముల్లో గత 25 ఏండ్లుగా ఎన్నో ప్రాజెక్టులు నిర్మించారు. ఐఎస్‌బీతోపాటు గచ్చిబౌలి స్టేడియం, ఐఐఐటీ, ప్రైవేటు బిల్డింగ్‌లు, రెసిడెన్షియల్ అపార్ట్‌మెంట్లు, హైదరాబాద్ యూనివర్సిటీ బిల్డింగ్‌లు నిర్మించారు. వాటిని నిర్మించేటప్పుడు ఎలాంటి వివాదాలు, ఆందోళనలు జరగలేదని అధికారులు ఈ సందర్భంగా ముఖ్యమంత్రి దృష్టికి తీసుకొచ్చారు.

అప్పుడు వన్యప్రాణి సంరక్షణ, పర్యావరణ విధ్వంసంలాంటి వివాదాలుకూడా లేవని అన్నారు. అలాంటప్పుడు అదే సర్వేనెంబర్‌లోని 400 ఎకరాల ప్రభుత్వ భూమిని అభివృద్ధి చేసేటప్పుడు ఎందుకు వివాదాస్పదమైందని సమావేశంలో చర్చ జరిగింది.

అబద్ధాలకు ఆజ్యం..

వివిధ రంగాల్లో పేరొందిన ప్రముఖులు కూడా వీటినే నిజమని నమ్మి సోషల్ మీడియాలో పోస్టులు, వీడియోలు పెట్టడంతో అబద్ధాలకు ఆజ్యం పోసినట్టయ్యిందని అధికారులు అన్నారు. ఏకంగా కేంద్రమంత్రి కిషన్‌రెడ్డి, మాజీ మంత్రి జగదీశ్‌రెడ్డి, సోషల్ మీడియా ఇన్‌ఫ్లూయెన్సర్ ధ్రువ్ రాఠీ, సినీ ప్రముఖులు జాన్ అబ్రహం, దియామీర్జా, రవీనా టాండన్ లాంటి వాళ్లందరూ ఏఐ ద్వారా సృష్టించిన ఫేక్ ఫొటోలు, వీడియోలు పోస్టుచేసి సమాజానికి  

తప్పుడు సందేశం చేరవేశారని ఈ సమావేశంలో చర్చ జరిగింది. ఈ భూములపై మొట్టమొదటగా ఫేక్ వీడియో పోస్ట్‌చేసిన జర్నలిస్ట్ సుమిత్‌జా కొద్దిసేపట్లోనే తన పో స్టును తొలగించి క్షమాపణలు చెప్పారని, కా నీ మిగతా ప్రముఖులెవరూ ఈ నిజాన్ని గు ర్తించకుండా అదే ఫేక్ వీడియోను ప్రచారం చేశారని అధికారులు అభిప్రాయపడ్డారు.

ఏఐ ఫేక్ కంటెంట్‌తో..భవిష్యత్తులో యుద్ధాలు 

కంచ గచ్చిబౌలిలో ఏఐ సృష్టించిన వివాదం ప్రజాస్వామ్య వ్యవస్థలకే పెనుసవా లు విసిరిందని ఈ సమావేశంలో చర్చ జరిగింది. ఇదేతీరుగా ఇండో ఇండో చైనా సరిహద్దుల్లాంటి వివాదాలు, ఘర్షణలకు దారితీసే సున్నితమైన అంశాల్లో ఏఐతో ఫేక్ కంటెంట్ సృష్టిస్తే భవిష్యత్తులో యుద్ధా లు జరిగే ప్రమాదం ఉంటుందని ఈ సందర్భంగా చర్చ జరిగింది.

ఆర్టిఫిషియల్ ఇంటెలిజెన్స్ (ఏఐ) ద్వారా తయారుచేసే ఫేక్ వీడి యోలు, ఫొటోలు..కరోనా వైరస్‌ను మించిన మహమ్మారిలాంటివని ఈ సమావేశం ఆందోళన వ్యక్తంచేసింది.

సైబర్ క్రైమ్ విభాగం బలోపేతానికి..

సమాజాన్ని తప్పుదోవ పట్టించే ఏఐ ఫేక్ కంటెంట్ తయారీపై విచారణకు ఆదేశించేలా రాష్ట్ర ప్రభుత్వం తరఫున కోర్టుకు విజ్ఞ ప్తి చేయాలని ముఖ్యమంత్రి అధికారులను ఆదేశించారు. మరోసారి ఇలాంటి ఘటనలు పునరావృతం కాకుండా రాష్ట్రంలో సైబర్ క్రైమ్ విభాగాన్ని బలోపేతం చేయాలని ము ఖ్యమంత్రి ఈ సందర్భంగా అధికారులను ఆదేశించారు.

ఏఐ ఫేక్ కంటెంట్‌ను పసిగట్టేలా అవసరమైన అధునాతన ఫోరెన్సిక్ హా ర్డ్‌వేర్, సాఫ్ట్‌వేర్ టూల్స్‌ను సమకూర్చుకోవాలని ముఖ్యమంత్రి రేవంత్‌రెడ్డి అధికారులకు సూచించారు. 

ఏఐ ద్వారా ఉన్నవి లేనట్టు.. లేనివి ఉన్నట్టు ప్రచారం

ఆర్టిఫిషియల్ ఇంటెలిజెన్స్ (ఏఐ) ద్వారా ఉన్నవి లేనట్టు, లేనివి ఉన్నట్టుగా వీడియోలు, ఫొటోలు సృష్టించి కొంద రు సోషల్ మీడియాలో విస్తృత ప్రచా రం చేయడంతో ఈ వివాదం జాతీయస్థాయిలో చర్చకు దారితీసిందని అధికా రులు ముఖ్యమంత్రికి వివరించారు.

ఏకంగా.. నెమళ్లు ఏడ్చినట్టుగా ఆడియో లు, బుల్డోజర్లకు జింకలు గాయపడి పరుగులు తీస్తున్నట్టుగా ఫేక్ ఫొటోలు, వీడియోలు తయారుచేశారని పోలీసు అధికారులు సీఎంకు చెప్పారు.