హైదరాబాద్: మహిళల శరీర ఆకృతిపై కామెంట్స్ చేసినా అది లైంగిక వేధింపుగా పరిగణించాలని, శిక్షార్హమైన నేరంగా పరిగణించబడుతుందని కేరళ హైకోర్టు(High Court of Kerala ) స్పష్టం చేసింది. తనపై అదే సంస్థకు చెందిన మహిళా సిబ్బంది దాఖలు చేసిన లైంగిక వేధింపుల కేసును రద్దు చేయాలంటూ కేరళ స్టేట్ ఎలక్ట్రిసిటీ బోర్డు (కెఎస్‌ఇబి) మాజీ ఉద్యోగి చేసిన విజ్ఞప్తిని తోసిపుచ్చుతూ జస్టిస్ ఎ. బదరుద్దీన్(Justice A. Badharudeen) ఈ తీర్పు వెలువరించారు. 2013 నుంచి నిందితుడు తనపై అసభ్య పదజాలం వాడారని, ఆపై 2016-17లో అభ్యంతరకర సందేశాలు, వాయిస్ కాల్స్ పంపడం ప్రారంభించారని మహిళ ఆరోపించింది. అతనిపై పోలీసులకు ఫిర్యాదులు చేసినప్పటికీ, అతను తనకు అభ్యంతరకరమైన సందేశాలను పంపుతూనే ఉన్నాడని పేర్కొంది. ఆమె ఫిర్యాదులను అనుసరించి, నిందితుడిపై ఐపీసీ సెక్షన్లు 354A (లైంగిక వేధింపులు) 509 (మహిళను అవమానించడం), సెక్షన్ 120(o) (అవాంఛనీయ కాల్, లేఖ, ద్వారా ఏదైనా కమ్యూనికేషన్ ద్వారా ఇబ్బంది కలిగించడం) కింద నేరాల కింద కేసు నమోదు చేయబడింది.