హైదరాబాద్,(విజయక్రాంతి): ముఖ్యమంత్రి రేవంత్ రెడ్డి ఆదివారం సాయంత్రం నాగర్ కర్నూల్ జిల్లాలోని దోమలపెంట సమీపంలోని శ్రీశైలం ఎడమ గట్టు కాలువ సొరంగం స్థలాన్ని సందర్శించి, సహాయక చర్యలపై అధికారులతో సమీక్షా సమావేశం నిర్వహిస్తారు. పాక్షికంగా కూలిపోయిన ఎస్ఎల్బీసీ సొరంగం లోపల చిక్కుకున్న కార్మికులను గుర్తించిన ప్రాంతాల నుండి బురదను తొలగించేందుకు అధికారులు సహాయక చర్యలను ముమ్మరం చేస్తున్నారు. ఈ ప్రమాదంలో దెబ్బతిన్న కన్వేయర్ బెల్ట్ సోమవారం నాటికి మరమ్మతులు చేయబడుతుందని, పునరుద్ధరించిన తర్వాత సొరంగం నుండి చెత్త, శిధిలాలను సులభంగా తొలగించడానికి వీలు కల్పిస్తుందని ఓ అధికారి పకటించారు. శనివారం నాడు లోపల చిక్కుకున్న ఎనిమిది మందిలో నలుగురి ఆచూకీ లభించడంతో రెస్క్యూ ఆపరేషన్‌లో గణనీయమైన పురోగతి కనిపించింది. 

నేషనల్ జియోఫిజికల్ రీసెర్చ్ ఇన్స్టిట్యూట్ (NGRI) శాస్త్రవేత్తలు గ్రౌండ్ పెనెట్రేటింగ్ రాడార్ (GPR)ను ఉపయోగించి సొరంగం లోపల కొన్ని అసాధారణతలను గుర్తించారు. మిగిలిన నలుగురు వ్యక్తులు టన్నెల్ బోరింగ్ యంత్రం కింద చిక్కుకున్నట్టు భావిస్తున్నామని, వారిని రక్షించడంలో పురోగతి సాధించడానికి కొంత సమయం పట్టవచ్చని రాష్ట్ర ఎక్సైజ్ మంత్రి జూపల్లి కృష్ణారావు వెల్లడించారు. ఆ నలుగురి పరిస్థితి ఏమిటని ఒక విలేకరి అడిగిన ప్రశ్నకు, వారు బతికే అవకాశాలు చాలా తక్కువ అని మంత్రి అన్నారు. శ్రీశైలం ఎడమ ఒడ్డు కాలువ (SLBC) సొరంగం పైకప్పు కూలిపోయిన ఘటనలో ఫిబ్రవరి 22న ఎనిమిది మంది ఇంజనీర్లు, కార్మికులు చిక్కుకున్నారు. వారిని సురక్షితంగా బయటకు తీసుకురావడానికి సహాయక చర్యలు ముమ్మరంగా తొమ్మిదవ రోజు  కొనసాగుతున్నాయి. టన్నెల్ లో చిక్కుకున్న వారు జార్ఖండ్‌కు చెందిన మనోజ్ కుమార్ (యుపి), శ్రీ నివాస్ (యుపి), సన్నీ సింగ్ (జె అండ్ కె), గురుప్రీత్ సింగ్ (పంజాబ్), సందీప్ సాహు, జెగ్తా జెస్, సంతోష్ సాహు,  అనుజ్ సాహుగా గుర్తించారు.