అమరావతి: ఆంధ్రప్రదేశ్ ముఖ్యమంత్రి చంద్రబాబు(AP CM Chandrababu) నాయుడుకు స్కిల్ డెవలప్‌మెంట్ కేసులో సుప్రీంకోర్టు(Supreme Court of India) నుంచి ఊరట లభించింది. చంద్రబాబు నాయుడు బెయిల్‌ను రద్దు చేయాలంటూ గత ప్రభుత్వం దాఖలు చేసిన పిటిషన్‌ను కోర్టు తోసిపుచ్చింది. ఈ కేసులో ఇప్పటికే ఛార్జిషీటు దాఖలయ్యిందని, ఈ దశలో జోక్యం చేసుకోలేమని కోర్టు పేర్కొంది. అయితే, అవసరమైనప్పుడు విచారణకు పూర్తి సహకారం అందించాలని చంద్రబాబు నాయుడు తరపు న్యాయవాదికి ధర్మాసనం సూచించింది.

జస్టిస్ బేల ఎం. త్రివేది నేతృత్వంలోని సుప్రీంకోర్టు ధర్మాసనం(Justice Bela Trivedi Bench) బుధవారం ఈ తీర్పును వెలువరించింది. వైఎస్సార్ కాంగ్రెస్ పార్టీ (వైఎస్‌ఆర్‌సీపీ) ప్రభుత్వం అప్పటి ప్రతిపక్ష నేతగా ఉన్న చంద్రబాబు నాయుడుపై స్కిల్ డెవలప్‌మెంట్(Skill Development Case) కేసును ప్రారంభించింది. అరెస్టు అనంతరం చంద్రబాబు నాయుడును జ్యుడీషియల్ కస్టడీకి తరలించారు. తరువాత, ఆంధ్రప్రదేశ్ హైకోర్టు 2023 నవంబర్ లో అతనికి బెయిల్ మంజూరు చేసింది. జైలు నుండి విడుదల చేయడానికి వీలు కల్పించింది. దీంతో అసంతృప్తికి గురైన వైఎస్సార్‌సీపీ ప్రభుత్వం బెయిల్‌ను రద్దు చేయాలని కోరుతూ సుప్రీంకోర్టును ఆశ్రయించింది. బుధవారం సుప్రీంకోర్టు ఈ పిటిషన్‌ను సమీక్షించింది. అయితే ఛార్జ్ షీట్ దాఖలు చేయడం కీలకమైన కారణంగా పేర్కొంటూ బెయిల్‌ను రద్దు చేయడానికి నిరాకరించింది.