న్యూఢిల్లీ: భారతదేశ ఉక్కు పరిశ్రమ(Vizag Steel Plant)ను ప్రోత్సహించే కీలక చర్యగా, వైజాగ్ స్టీల్ ప్లాంట్ (రాష్ట్రీయ ఇస్పాత్ నిగమ్ లిమిటెడ్ (RINL)) కోసం రూ. 11,440 కోట్ల విలువైన పునరుద్ధరణ ప్యాకేజీకి ప్రధాని నరేంద్ర మోదీ ఆమోదం తెలిపారని కేంద్ర మంత్రి అశ్విని వైష్ణవ్(Union Minister Ashwini Vaishnaw) శుక్రవారం ప్రకటించారు. కేబినెట్ సీసీఈఏ సమావేశంలో ఈ నిర్ణయం తీసుకున్నారని కేంద్రమంత్రి వెల్లడించారు. ఆంధ్రప్రదేశ్‌లోని విశాఖపట్నంలో ఉన్న ఆర్‌ఐఎన్‌ఎల్ దేశంలోని ఉక్కు రంగంలో కీలక పాత్ర పోషిస్తోందని, ఓడరేవు ఆధారిత స్టీల్ ప్లాంట్‌గా దాని ప్రత్యేక ప్రయోజనం ఉందని మంత్రి వైష్ణవ్ హైలైట్ చేశారు. 

కేంద్రం ప్రకటించిన ప్యాకేజీకి ఏపీ సీఎం కృతజ్ఞతలు

స్టీల్ ప్లాంటుకు కేంద్ర ప్యాకేజీ చరిత్రాత్మక నిర్ణయమని సీఎం చంద్రబాబు(N. Chandrababu Naidu) పేర్కొన్నారు. కేంద్రం ప్యాకేజీ ప్రకటించినందకు ప్రధాని నరేంద్ర మోదీకి సీఎం చంద్రబాబు హృదయపూర్వక కృతజ్ఞతలు తెలియజేశారు. ఇది ఏపీ గర్వించదగ్గ విషయం అన్నారు. ఉక్కు కర్మాగారానికి తన అచంచలమైన మద్దతు కోసం, విక్షిత్ భారత్ - విక్షిత్ ఆంధ్రలో భాగంగా దేశ నిర్మాణానికి సంబంధించిన ప్రధాన మంత్రి దృష్టికి దోహదపడుతుందని తాను హామీ ఇస్తున్నానని చంద్రబాబు పేర్కొన్నారు. వైజాగ్ స్టీల్ ప్లాంట్ కేవలం కర్మాగారం మాత్రమే కాదు.. ఇది ఆంధ్రప్రదేశ్(Andhra Pradesh) ప్రజల పోరాటాలు, స్ఫూర్తికి స్మారక చిహ్నంగా నిలుస్తుందన్నారు. అందరి హృదయాలలో, ముఖ్యంగా వైజాగ్ ప్రజల హృదయాలలో ప్రత్యేక స్థానాన్ని కలిగి ఉందని చెప్పారు. ఇది కేవలం ఎన్నికల వాగ్దానం కాదన్న చంద్రబాబు ఇది తాము గౌరవించాలని నిశ్చయించుకున్న లోతైన వ్యక్తిగత నిబద్ధత అన్నారు. ఆంధ్రప్రదేశ్‌కి మంచి రోజులు రానున్నాయని చంద్రబాబు ఎక్స్ లో పోస్టుచేశారు.

విశాఖ ఉక్కు - ఆంధ్రుల హక్కు: ముఖ్యమంత్రి చంద్రబాబు

విశాఖ ఉక్కు - ఆంధ్రుల హక్కు( Visakha Ukku Andhrula Hakku).. చెప్పిన మాటను ముఖ్యమంత్రి చంద్రబాబు నిలబెట్టుకున్నారు. విశాఖ స్టీల్‌ప్లాంట్‌కు రూ.11,440 కోట్లతో ఆర్థిక ప్యాకేజీ ప్రకటించి విశాఖ స్టీల్ ప్లాంట్ కు కేంద్రం ఊపిరి పోసిందని పేర్కొన్నారు. నాడు 1999లో కూడా నాటి వాజ్ పాయ్ ప్రభుత్వాన్ని ఒప్పించి విశాఖ స్టీల్ కు ఆర్థిక ప్యాకేజీ తెచ్చి చంద్రబాబు ఉపిరి పోశారు. నేడు మళ్ళీ ప్రధాని మోడీ ఆంధ్రుల సెంటిమెంట్ వివరించి, ప్రైవేటీకరణ ఆపించి,  ఆర్థిక ప్యాకేజీ వచ్చేలా చేశారని టీడీపీ నాయకులు సంతోషం వ్యక్తం చేస్తున్నారు. గత 5 ఏళ్ళుగా, నాటి వైసీపీ ప్రభుత్వ కుట్రలు చేధించి, ప్రజల భాగస్వామ్యంతో, విశాఖ ఉక్కు ప్రైవేటీకరణ కాకుండా  తెలుగుదేశం పార్టీ ఉద్యమాలు చేసిన విషయం తెలిసిందే.