ఫిబ్రవరి 15 నుంచి షురూ

న్యూఢిల్లీ, నవంబర్ 21: ప్రస్తుత విద్యాసంవత్సరానికి గాను సీబీఎస్‌ఈ 10, 12వ తరగతులకు సంబంధించిన బోర్టు పరీక్షల తేదీలను సెంట్రల్ బోర్డ్ ఆఫ్ సెకండరీ ఎడ్యుకేషన్ గురువారం ప్రకటించింది. 2025 ఫిబ్రవరి 15 నుంచి పది, 12వ తరగతి పరీక్షలు ప్రారంభమవుతాయి. షెడ్యూల్ ప్రకా రం మార్చి 18వరకు పదోతరగతి, ఏప్రిల్ 4వరకు 12వ తరగతి పరీక్షలు కొనసాగుతాయి.

ఈ మేరకు సీబీఎస్‌ఈ బోర్డు డేట్‌షీట్‌ను విడుదల చేసింది. కాగా పరీక్షలకు 86 రోజుల ముందుగానే ఎగ్జామ్ డేట్లను ప్రకటించడం ఇదే మొదటిసారి. కాగా గత కొన్నేళ్లకు భిన్నంగా ఈసారి ప్రధాన సబ్జెక్టులకు ముందుగా పరీక్షలు నిర్వహించనుంది.

అయితే పది, 12వ తరగతలు పరీక్షా విధానంలో మార్పు లు, సిలబస్ తగ్గింపు గురించి సోషల్ మీడియాలో వస్తున్న వార్తలను బోర్డు ఖండించింది. ఆయా వార్తలన్నీ పుకార్లేనని.. వాటిని నమ్మవద్దని స్పష్టం చేసింది. సీబీఎస్‌ఈ అధికారిక వెబ్‌సైట్‌లోని సమాచారంపై మాత్రమే ఆధారపడాలని సూచించింది.