• హయత్‌నగర్‌లో ఫ్రెండ్లీ పోలీసింగ్ 
• మరిచిపోయిన ఆభరణాల బ్యాగ్  బాధితులకు అందజేత

ఎల్బీనగర్, మార్చి 9 : ఫ్రెండ్లీ పోలీసింగ్ కు హయత్ నగర్ పోలీసులు నిదర్శనంగా నిలిచారు. ఆటోలో మర్చిపోయిన విలువైన ఆభరణాలు ఉన్న హ్యాండ్ బ్యాగు తిరిగి అప్పగించారు. హయత్ నగర్ సీఐ నాగరాజు గౌడ్ తెలిపిన వివరాలు.... వీరసత్యమల్లేశ్, భార్య సుష్మతో కలిసి, ఈ నెల 8వ తేదీన ఉదయం 5:30 గంటలకు  ఆంధ్రా నుంచి హైదరాబాద్ లోని హయత్ నగర్ డివిజన్ సూర్యానగర్ కాలనీలో నివాసముంటున్న స్నేహితుడు శరత్ చంద్ర ఇంటికి వస్తున్నారు.

ఈ క్రమంలో హయత్ నగర్ లోని బజాజ్ ఎలక్ట్రానిక్స్ దగ్గర బస్సు దిగి అక్కడ నుంచి లోకల్ ఆటోలో సూర్యానగర్ కాలనీకి వెళ్లారు. కాగా, శరత్ చంద్ర ఇంటికి వెళ్లిన తర్వాత సామగ్రిని తనిఖీ చేయగా, ఆటోలో హ్యాండ్ బ్యాగును మర్చిపోయినట్లుగా గుర్తించారు. వెంటనే ఆటో గురించి వెతకగా ఎటువంటి సమాచారం లభించకపోవడంతో హయత్ నగర్ పోలీస్ స్టేషన్ కి వచ్చి ఫిర్యాదు చేశారు. వెంటనే హయత్ నగర్ క్రైమ్ పోలీసులు సీసీ కెమెరాల ఆధారంగా ఆటోను గుర్తించి డ్రైవర్ బుక్యా నాగేశ్వర రావును గుర్తించారు. 

ఆటోలో తనిఖీ చేయగా హ్యాండ్ బ్యాగు ను స్వాధీనం చేసుకున్నారు. బ్యాగ్‌లో ఉన్న బంగారు ఆభరణాలు (జత కమ్మలు), ఒక జత బ్లాక్ బీట్స్ చైన్, రెండు లాకెట్ చైన్లు, ఒక పాపిటబిళ్ళతోపాటు రూ.14వేల నగదు, ఒక విలువైన వాచ్ ఉన్నాయి.

బాధితులను పోలీస్ స్టేషన్ కు పిలిపించి, బంగారు ఆభరణాలు ఉన్న బ్యాగ్ ను హయత్ నగర్ పోలీసులు తిరిగి అప్పగించారు. తక్కువ సమయంలో తమ బ్యాగ్‌ను అందజేసిన హయత్ నగర్ పోలీసులను బాధితులతోపాటు సూర్యానగర్ కాలనీవాసులు కృతజ్ఞ తలు చెప్పి, అభినందించారు.