ఒక రోజు అక్బర్ మహారాజు తన సభలో “మనుషులు, వారి స్వభావానికి తగ్గ వృత్తి ఎంచుకుంటారు” అని అన్నారు. 

అది బీర్బల్ ఒప్పుకోలేదు. మనిషి వృత్తికీ స్వభావానికి సంబంధం ఉండదని ప్రస్తావించాడు. 

అక్బర్ కి బీర్బల్ అంటే చాలా ఇష్టం. అతని తెలివి తేటలు, మేధస్సు మీద చాలా నమ్మకం. కానీ అప్పుడప్పుడు పరీక్షలు పెట్టడం సరదా.

అందుకనే మనిషి వృత్తికి, స్వభావానికి సంబంధం లేదు అని బీర్బల్ అంటే, అక్బర్ వెంటనే ఆ విషయం నిరూపించి చూపించమని బీర్బల్‌కి పరీక్ష పెట్టారు.

 “సరే, రేపు ఇద్దరం మారు వేషం వేసుకుని నగర పర్యటన చేద్దాము. ఈ సత్యానికి నిదర్శనం నేను మీకు రేపు చూపిస్తాను.”! అని బీర్బల్ ఒప్పుకున్నాడు. 

అనుకున్న ప్రకారం ఇద్దరూ మారు వేషం వేసుకుని నగర పర్యటన చేశారు. నగరంలో ఒక మిఠాయిలు అమ్ముకునే వ్యాపారస్తుడు కనిపించాడు. 

బీర్బల్ చాలా దీనంగా ముఖం పెట్టి.. మిఠాయిలు అమ్ముకునే అతని దగ్గరకు వెళ్లి “మేము పొరుగూరి నుంచి వస్తున్నా బాటసారులం. దారిలో దొంగలు పడి, ఉన్నదంతా దోచుకున్నారు! ఇప్పుడు చాలా ఆకలి వేస్తోంది. కొంచెం సహాయం చేస్తారా? తినడానికి మీ కొట్టులోంచి ఏమైనా ఇప్పించండి!” అని నాటకం ఆడాడు. 

మిఠాయి కొట్టులో కూర్చున్న వ్యాపారస్తుడు చీదరించుకుని.. “ఛీ.. ఛీ.. దందా చేసుకునే టైంలో ఈ గోలేంటి? నిన్ను చూసికొనే వాళ్లు కూడా రారు! పొ! పొ!” అని చికాకుగా చిత్కరించాడు. 

బీర్బల్ ఊరుకో కొండా, చాలా ఆకలి వేస్తోంది అని బతిమాలాడు. 

మిఠాయి అమ్ముకునే వ్యాపారస్తుడు తన చుట్టూరా తినుభండారాలు పెట్టుకుని కూడా ఏ మాత్రం చలించలేదు. సహాయకుల చేత బీర్బల్‌ను మెడ బట్టి కొట్టు బయటకు గెంటించాడు. 

బీర్బల్ అక్బర్ మహారాజుతో అలాగే మారువేషంలో అక్కడ నుంచి వెళ్లి పోయాడు. ఒక బండలు కొట్టే మేస్త్రి కనిపించాడు. 

అలాగే మారు వేషంలో ఇద్దరూ ఆ బండలు కొట్టే అతని దగ్గరకు వెళ్లారు. బీర్బల్ మళ్లీ అదే నాటకం ఆడాడు. 

“అయ్యా! మేము పొరుగూరి నుంచి వస్తున్నా బాటసారులం. దారిలో దొంగలు పడి, ఉన్నదంతా దోచుకున్నారు! ఇప్పుడు చాలా ఆకలి వేస్తోంది. కొంచెం సహాయం చేస్తారా?” అని మేస్త్రీకి కూడా అదే కథ చెప్పాడు. 

ఆ మేస్త్రీ వెంటనే, “అయ్యో! అలాగా! నాతో రండి.” అని అతని కుటీరానికి తీసుకుని వెళ్లాడు. వాళ్లకు కాళ్లు కడిగి, ఇంట్లోకి తీసుకుని వెళ్లి, ఉన్న కొంచెంలోని భార్యను అతిథులకు తగ్గ భోజనం తయారు చేసి వడ్డించమన్నాడు. 

అతని భార్య కూడా అలాగే అన్నం, కూర, పచ్చడి, పులుసు, తయారు చేసి రుచికరమైన భోజనం వడ్డించింది. 

భోజనం అయ్యాక, కొంచెం సేపు విశ్రాంతి తీసుకోమని అరుగు మీద మంచాలు నీడలోకి లాగి అక్బర్, బీర్బర్‌కు విసనకర్రలు ఇచ్చాడు. 

ఇలా మర్యాదగా అతిథులు లాగా సత్కరించాడు. సాయంత్రానికి అక్బర్, బీర్బల్ సెలవు తీసుకుంటుంటే, దారిలో తినడానికి కొంత తిను భండారం ఒక మూటలో కట్టి ఇచ్చాడు. 

తిరిగి సభకు చేరాకా.. బీర్బల్ అక్బర్‌తో..“ప్రభు! ప్రభు! చూశారా! మిఠాయిలు చేసే వృత్తి ఎంచుకున్న వ్యాపారస్తుడికి తీయని స్వభావం లేదు. అలాగే బండలు కొట్టుకునే వృత్తి ఎంచుకున్న మేస్త్రీకి సఖ్త హృదయం లేదు! మనిషి వృత్తికి స్వభావానికి సంబంధం ఉండదని మీరు ఇప్పుడు ఒప్పుకుంటారా?” అని అడిగాడు. 

అక్బర్ చిరు నవ్వుతో బీర్బల్ చెప్పినది ఒప్పుకున్నారు. ఆపదలో ఉన్న బాటసారులను ఆదుకున్న ఆ మేస్త్రీకి, అతని కుటుంబానికి బహుమూల్యమైన బహుమతులు పంపించి, కృతజ్ఞత తెలియ చేసుకున్నారు. 

 https://kathalu.wordpress.com సౌజన్యంతో..