ఛత్తీస్‌గఢ్‌: ఛత్తీస్‌గఢ్‌లోని కొండగావ్ జిల్లాలో ప్రయాగ్‌రాజ్‌లో మహా కుంభ్‌(Prayag Kumbh Mela)కు వెళ్తున్న కారు కల్వర్టు నుండి పడిపోవడంతో ఒకే కుటుంబానికి చెందిన ఇద్దరు మృతి చెందగా, నలుగురు గాయపడ్డారని పోలీసులు  వెల్లడించారు. జాతీయ రహదారి-30లోని ఫరాస్గావ్ పోలీస్ స్టేషన్ పరిధిలోని బోర్గావ్ గ్రామ సమీపంలో శనివారం ఉదయం 6.45 గంటల ప్రాంతంలో ఈ ప్రమాదం జరిగిందని ఒక అధికారి తెలిపారు.

ప్రాథమిక సమాచారం ప్రకారం, బెంగళూరు నుండి ఒక కుటుంబ సభ్యులు రెండు కార్లలో ప్రయాగ్‌రాజ్‌కు వెళుతుండగా ఒక కారు డ్రైవర్ వాహనంపై నియంత్రణ కోల్పోయాడని, అది ఒక మలుపు వద్ద రోడ్డు పక్కనే అదుపు తప్పి, ఒక చిన్న కల్వర్టు నుండి పడి చెట్టును ఢీకొట్టిందని అధికారి తెలిపారు. ఈ ప్రమాదంలో "ఇద్దరు అక్కడికక్కడే మరణించారు, నలుగురు గాయపడ్డారు" అని ఆయన చెప్పారు. ఒక ప్రయాణీకుడు అంబులెన్స్ కోసం ఫోన్ చేసి పోలీసులకు సమాచారం అందించాడని, ఆ తర్వాత గాయపడిన వారిని ఫరాస్గావ్‌లోని ఆసుపత్రికి తరలించామని అధికారి తెలిపారు. ఈ ఘటనపై కేసు నమోదు చేసుకున్న పోలీసులు మృతదేహాలను స్వాధీనం చేసుకుని పోస్టుమార్టం నిమిత్తం మార్చురీకి తరలించారు.