హైదరాబాద్: నిజామాబాద్‌లో పసుపుబోర్డు ఏర్పాటును స్వాగతించిన బీఆర్‌ఎస్‌ ఎమ్మెల్సీ కె.కవిత(Kalvakuntla Kavitha) ప్రోటోకాల్‌ను విస్మరించి రాష్ట్ర ప్రభుత్వంతో పాటు స్థానిక ప్రజాప్రతినిధులను పక్కనపెట్టి బీజేపీ కార్యక్రమంగా మార్చిందని తీవ్రంగా విమర్శించారు. కేంద్ర ప్రభుత్వం పసుపుకు కనీస మద్దతు ధర (MSP)ని రూ.15,000కి పెంచాలని, పసుపు దిగుమతులను పరిమితం చేయాలని, రైతులకు నిజమైన ఆదరణ కల్పించేందుకు లాజిస్టికల్ సహాయం అందించాలని కవిత డిమాండ్ చేశారు.

“స్థానిక ప్రజాప్రతినిధులకు తెలియజేయకుండా ప్రారంభోత్సవం బిజెపి కార్యక్రమంలా జరిగింది. బీజేపీ మంత్రులు, ఎమ్మెల్యేలు, ఎంపీలు మాత్రమే హాజరు కావడం నిరాశపరిచింది’’ అని ఆమె వ్యాఖ్యానించారు. ఆదివారం నిజామాబాద్‌లో విలేకరుల సమావేశంలో కవిత మాట్లాడుతూ... పసుపు రైతుల కోసం దశాబ్దకాలంగా తాను చేస్తున్న కృషిని, 2014లో అప్పటి కేంద్ర వాణిజ్య శాఖ మంత్రి నిర్మలా సీతారామన్‌(Union Minister Nirmala Sitharaman)కు లేఖ రాయడం, ప్రధాని నరేంద్ర మోదీని రెండుసార్లు కలవడం, రూ.15 వేల మద్దతు ధర కోసం కృషి చేశామన్నారు. “పసుపు బోర్డు ఒక్కటే సరిపోదు. రైతులకు గ్యారెంటీ మద్దతు ధర అవసరం, నాణ్యత లేని పసుపు దిగుమతులను నియంత్రించాలి ”అని ఆమె నొక్కిచెప్పారు. 2014 నుండి పసుపు దిగుమతులు రెట్టింపు అయ్యాయని, స్థానిక రైతులకు నష్టం వాటిల్లుతోందన్నారు. ఆమె బిజెపి ఎంపీ అరవింద్‌(BJP MP Arvind Dharmapuri)ను ఉద్దేశించి, విరుద్ధమైన ప్రకటనలతో, అతని వాగ్దానాలను నెరవేర్చడంలో విఫలమయ్యారని ఆరోపించారు. “అరవింద్ తాను ఎన్నికైన ఐదు రోజుల్లో పసుపు బోర్డును తీసుకువస్తానని పేర్కొన్నాడు. కానీ తరువాత స్పైసెస్ బోర్డు మంచిదని వాదించాడు. 

అరవింద్ తన ప్రయత్నాల వల్ల పసుపు ధరలు పెరగడం గురించి ప్రగల్భాలు పలికారని ఆరోపించారు. పసుపు ఆధారిత పరిశ్రమల స్థాపన సహా రైతులకు మేలు చేసేలా బీజేపీ తక్షణమే చర్యలు తీసుకోవాలని కవిత డిమాండ్ చేశారు. నిజామాబాద్ జిల్లా వేల్పూర్‌లో స్పైసెస్ పార్కు(Velpur Spices Park) కోసం 42 ఎకరాలు కేటాయించడం, జక్రాన్‌పల్లి ఎయిర్‌పోర్టు కోసం 800 ఎకరాలు సేకరించడం వంటి చురుకైన చర్యలను కే. చంద్రశేఖర్‌రావు(K. Chandrashekar Rao) ప్రభుత్వం చేపట్టిందని ఆమె సూచించారు. ప్రజలు ప్రతి కదలికను గమనిస్తున్నారని కవిత పేర్కొన్నారు. ఎంపీగా తన పదవీకాలంలో పసుపు ఆధారిత పరిశ్రమల కోసం ఒత్తిడి తెచ్చేందుకు చేసిన ప్రయత్నాలను ఆమె గుర్తుచేసుకున్నారు. నిజామాబాద్‌కు విమానాశ్రయం(Nizamabad Airport) తీసుకురావడానికి స్థానిక నాయకులు, ముఖ్యంగా ఎంపీ ధర్మపురి అరవింద్ నుండి జవాబుదారీతనం అవసరాన్ని కవిత నొక్కి చెప్పారు.