హైదరాబాద్: శేరిలింగంపల్లి ఎమ్మెల్యే అరికెపూడి గాంధీ నివాసానికి చేరుకోవాలని పార్టీ కార్యకర్తలకు పిలుపునిచ్చిన నేపథ్యంలో బీఆర్‌ఎస్ నేతలు హరీశ్ రావు, ఎమ్మెల్సీ శంభీపూర్ రాజు, మాజీ మంత్రులు తలసాని శ్రీనివాస్ యాదవ్, మల్లారెడ్డి, ఎమ్మెల్యే  కెపి వివేకానంద, మాధవరం కృష్ణా రావులను పోలీసులు హౌజ్ అరెస్ట్ చేశారు. కోకపేట్‌లోని హరీష్ రావు ఇంటి వద్దకు భారీగా పోలీసులు చేరుకున్నారు. హరీష్ రావును కలిసేందుకు వచ్చే నేతలు, కార్యకర్తలను పోలీసులు అడ్డుకుంటున్నారు. అటు మాజీ మంత్రి ఎమ్మెల్యే సునీత లక్ష్మారెడ్డి, మాజీ ఎంపీ మాలోత్ కవిత, మాజీ ఎమ్మెల్యే క్రాంతి అరెస్ట్ చేసిన పోలీసులు ఏ పోలీస్ స్టేషన్ కు తీసుకువెళ్తున్నారో కూడా చెప్పడం లేదంటూ బీఆర్ఎస్ నాయకులు ఆగ్రహం వ్యక్తం చేశారు.

గాంధీ నివాసానికి చేరుకోవాలని పార్టీ కార్యకర్తలకు పిలుపునివ్వడంతో బీఆర్‌ఎస్ నాయకులు, శేరిలింగంపల్లి ఎమ్మెల్యే మధ్య వాగ్వాదం కొనసాగింది. పార్టీ కార్యకర్తలను ఉదయం 11 గంటలకు శంభీపూర్ రాజు నివాసం వద్ద సమావేశమవ్వాలని, ఆయన వారిని గాంధీ నివాసానికి తీసుకెళ్లాలని సూచించారు. అయితే, పోలీసులు బీఆర్‌ఎస్ నేతల ప్రణాళికలను భగ్నం చేశారు. హరీశ్‌రావు, శంభీపూర్‌రాజు తదితరుల నివాసాల వద్ద భారీ పోలీసు బందోబస్తు ఏర్పాటు చేసి వారిని బయటకు వెళ్లకుండా అడ్డుకున్నారు. 

అంతకుముందు గురువారం, అధిక రాజకీయ నాటకం జరిగింది, దీని ఫలితంగా బీఆర్ఎస్, కాంగ్రెస్‌కు చెందిన నాయకుల అరెస్టులు జరిగాయి. కౌశిక్ రెడ్డి, అరికెపూడి గాంధీ డ్రామా అనంతరం బీఆర్‌ఎస్ నాయకులను రంగారెడ్డి జిల్లా కేశంపేట పోలీస్ స్టేషన్‌కు తరలించి అర్థరాత్రి విడుదల చేశారు. కాగా, తెలంగాణలో లా అండ్ ఆర్డర్ పట్ల ముఖ్యమంత్రి రేవంత్ రెడ్డి సీరియస్ అయ్యారు. రాష్ట్రంలో శాంతిభద్రతలకు విఘాతం కలిగిస్తున్న వారిపై కఠిన చర్యలు తీసుకోవాలని తెలంగాణ ముఖ్యమంత్రి రేవంత్ రెడ్డి డీజీపీ జితేందర్‌ను ఆదేశించారు. రాజకీయ కుట్రలను సహించేది లేదని, హైదరాబాద్ ప్రతిష్టను దెబ్బతీసేందుకు బీఆర్‌ఎస్ పని చేస్తోందని ఆరోపించారు. సిఎం ఆదేశాల మేరకు డిజిపి డాక్టర్ జితేందర్ ఇటీవలి పరిణామాలను దృష్టిలో ఉంచుకుని హైదరాబాద్, సైబరాబాద్, రాచకొండ పోలీస్ కమిషనర్‌లతో సమావేశం నిర్వహించారు.