హైదరాబాద్,(విజయక్రాంతి): దశాబ్ద కాలంగా ప్రజల హక్కులను ఉల్లంఘించిన పార్టీకి ఇతరులను విమర్శించే నైతికత లేదని ఐటీ,పరిశ్రమలు శాఖ మంత్రి శ్రీధర్ బాబు శనివారం బిఆర్‌ఎస్‌ను తీవ్రంగా విమర్శించారు. హెచ్ఐసీసీ(HICC) నోవాటెల్‌లో జరుగుతున్న అంతర్జాతీయ రాజకీయ సదస్సు భారత్ సమ్మిట్ 2025లో ప్రసంగించిన మంత్రి, ఉప ముఖ్యమంత్రి భట్టి విక్రమార్కతో కలిసి సమావేశాలలో న్యాయ్ పత్ (Path Of Justice) ఎగ్జిబిషన్ ను  ప్రారంభించారు.

భారతదేశ చారిత్రక మైలురాళ్లతో యువతరాన్ని పరిచయం చేయడం, దాని సానుకూల అంతర్జాతీయ సంబంధాలపై అవగాహన పెంపొందించడమే లక్ష్యంగా ఈ ఎగ్జిబిషన్ నిర్వహించబడిందని ఆయన పేర్కొన్నారు. ప్రపంచ ప్రగతిశీల ఉద్యమానికి దిశాత్మక నాయకత్వాన్ని అందించడానికి ఈ శిఖరాగ్ర సమావేశం ప్రయత్నిస్తుందని శ్రీధర్ బాబు చెప్పారు. ప్రగతిశీల ఆలోచన, ప్రజాస్వామ్యం, ప్రపంచ శాంతి వంటి రంగాలలో పనిచేస్తున్న 100కి పైగా దేశాల నుండి వచ్చిన మేధావులను ఈ చొరవలో భాగస్వాములుగా చేశారన్నారు.

కాంగ్రెస్ జాతీయ అధ్యక్షుడు మల్లికార్జున్ ఖర్గే, ఎంపీ రాహుల్ గాంధీ నాయకత్వంలో రాజ్యాంగ స్ఫూర్తిని నిలబెట్టడానికి కాంగ్రెస్ దృఢంగా కృషి చేస్తోందని శ్రీధర్ బాబు వ్యాఖ్యానించారు. ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వ ప్రతిష్టను దెబ్బతీసేందుకు బీఆర్ఎస్ నాయకులు ఎఐ జనరేటెడ్ కంటెంట్‌ను ఉపయోగించి దురుద్దేశంతో ప్రయత్నిస్తున్నారని మంత్రి ఆరోపించారు. ఎగ్జిబిషన్ నుండి ఛాయాచిత్రాలను సోషల్ మీడియాలో ముందస్తుగా విడుదల చేయడం వెనుక ఉన్న ఉద్దేశాలను ప్రశ్నిస్తూ శ్రీధర్ బాబు బీఆర్ఎస్ నాయకులు తమ పద్ధతులను మర్చుకోవాలని హెచ్చరించారు.