1. హత్య కేసులో బావ మరుదుల అరెస్ట్ 
2. వివరాలు వెల్లడించిన సౌత్ వెస్ట్ జోన్ డీసీపీ చంద్రమోహన్

కార్వాన్, సెప్టెంబర్ 25: అక్కను వేధిస్తున్నాడని ఇద్దరు బావమరుదులు బావను హతమార్చారు. ఈ కేసులో ఇద్దరు నిందితులను గోల్కొండ అరెస్టు చేసి రిమాండుకు తరలించారు.

సౌత్ వెస్ట్ జోన్ డీసీపీ చంద్రమోహన్ బుధవారం వివరాలు వెల్లడిం చారు. గోల్కొండ ప్రాంతానికి చెందిన అబ్దుల్ ఖదీర్ తన కూతురును ఆసిఫ్‌నగర్‌కు చెందిన మహ్మద్ సలీంకు 16 ఏళ్ల క్రితం వివాహం చేశాడు. కొన్నాళ్ల నుంచి సలీం భార్యపై వేధింపులకు పాల్పడుతున్నాడు.

దీంతో భార్య పుట్టింటికి వచ్చింది. ఆదివారం భార్యను తిరిగి తీసుకెళ్లేందుకు సలీం అత్తగారింటికి వచ్చాడు. ఇదే విషయంపై బావమరుదులైన ఆమోదు, రాహెద్ స్పందించి బావ సలీంతో గొడవకు దిగారు. సలీంపై కత్తితో దాడి చేసి చంపేశారు. నిందితులను పోలీసులు అరెస్టు చేసి రిమాండుకు తరలించారు.