పవన్ కల్యాణ్ ప్రధాన పాత్రలో రూపొందుతున్న చిత్రం ‘హరి హర వీరమల్లు’. క్రిష్, జ్యోతికృష్ణ దర్శకత్వంలో ఈ సినిమా శరవేగంగా రూపొందుతోంది. ఈ సినిమా నుంచి ఇప్పటికే వచ్చిన పవన్ పాడిన పాట సోషల్ మీడియాను షేక్ చేస్తోంది. పీరియాడిక్ యాక్షన్ అడ్వెంచర్ మూవీగా రూపొందుతున్న  చిత్రంలో బాబీడియోల్ విలన్‌గా కనిపించనున్నారు.

సోమవారం ఆయన పుట్టినరోజు సందర్భంగా చిత్ర బృందం ఆయన లుక్‌కి సంబంధించిన ఒక కొత్త పోస్టర్‌ను విడుదల చేసింది. ఆ పోస్టర్‌లో బాబీడియోల్ రాజుల కాలం నాటి దుస్తుల్లో కత్తి పట్టుకుని యుద్ధానికి సిద్ధమవుతున్నట్టుగా కనిపిస్తున్నారు. ప్రస్తుతం ఆయన లుక్ నెట్టింట వైరల్ అవుతోంది.

‘హరి హర వీరమల్లు’ చిత్రం రెండు భాగాలుగా విడుదల కానున్న విషయం తెలిసిందే. తొలి భాగం ‘హరిహర వీరమల్లు పార్ట్ 1: స్వార్డ్ వర్సెస్ స్పిరిట్’ పేరిట రూపొందుతోంది. నిధి అగర్వాల్ ఈ చిత్రంలో హీరోయిన్‌గా నటిస్తోంది. అనుపమ్ ఖేర్, నోరాహి ఫతేహి, విక్రమ్ జీత్, జిషు సేన్ గుప్తా తదితరులు కీలక పాత్రలు పోషిస్తున్నారు.