‘నువ్విలా’ చిత్రంతో సినీ రంగ ప్రవేశం చేసిన హవీష్ కథానాయకుడిగా తెరకెక్కుతున్న తాజా చిత్రం ‘ఎస్ బాస్’. కాంచన కోనేరు సమర్పణలో రానున్న ఈ సినిమాకి ‘భాగమతి’ ఫేమ్ జి.అశోక్ దర్శకత్వం వహిస్తున్నారు. తాజాగా ఈ సినిమా చిత్రీకరణ పూర్తి అవ్వగా, మంగళవారం హవీష్ పుట్టినరోజు సందర్భంగా ఓ పోస్టర్‌ను విడుదల చేసింది చిత్ర బృందం. ‘సెవన్’,  ‘రామ్ లీల’, ‘జీనియస్’ వంటి చిత్రాలతో తన సినీ ప్రయాణం సాగిస్తున్న హవీష్, కమర్షియల్ ఎంటర్‌టైనర్‌గా ముస్తాబైన ‘ఎస్ బాస్’ సినిమా ద్వారా త్వరలో ప్రేక్షకుల ముందుకు రానున్నారు. కె స్టూడియోస్ బ్యానర్‌పై ‘రాక్షసుడు’, ‘ఖిలాడి’ వంటి చిత్రాలను నిర్మించిన కొనేరు సత్యనారాయణ నిర్మాణంలో రూపొందుతున్న ఈ సినిమాలో ప్రముఖ హాస్యనటుడు బ్రహ్మానందం కీలక పాత్ర పోషిస్తున్నారు. సీనియర్ రచయిత ఆకుల శివ కథ, మాటలు అందిం చిన ఈ సినిమాకి కబీర్ లాల్ ఛాయాగ్రహణం సమకూర్చుతుండగా, అనూప్ రూబెన్స్ స్వరాలందిస్తున్నారు.