26మంది అరెస్టు

శేరిలింగంపల్లి, నవంబర్ 3: మాదాపూర్‌లోని ఐటీ కారిడార్‌లో దీపావళి పండుగ రోజున క్రాకర్స్‌తో బైక్‌లపై స్టంట్లు చేస్తూ రెచ్చిపోయిన పోకిరీలను పోలీసులు అరెస్టు చేశారు. వీరంతా దీపావళి రోజున బయోడైవర్సిటీ, మైహోమ్ భుజ రహదారిలో క్రాకర్స్‌ను వెలిగించి బైక్ స్టంట్లు చేశారు. ఈ ఘటనపై ఆర్టీసీ ఎండీ వీ.సీ.సజ్జనార్ తీవ్రంగా స్పందిస్తూ ఎక్స్‌లో పోస్ట్ చేశారు.

స్పందించిన రాయదుర్గం పోలీసులు.. స్టంట్‌లకు పాల్పడిన పదిమంది బైక్ రేసర్స్‌ను అదుపులోకి తీసుకున్నారు. వారిపై కేసులు నమోదు చేసి వారి వద్ద నుంచి రేసింగ్ బైక్‌లను స్వాధీనం చేసుకున్నారు. గత రెండున్నర నెలల్లో 250కి పైగా కేసులు నమోదు చేసినప్పటికీ పోకిరీల వైఖరి మారడంలేదని తెలిపారు. ఇకపై ఐటీ కారిడార్‌లో బైక్ రేసింగ్‌లకు పాల్పడితే కఠిన చర్యలు ఉంటాయని హెచ్చరించారు.