కంటెంట్ ప్రధానంగా, యూనిక్ కాన్సెప్ట్తో తెరకెక్కుతున్న చిత్రాలను ప్రేక్షకులు ఎక్కువగా ఆదరిస్తున్నారు. కొత్త పాయింట్ ను సరికొత్తగా చెప్పే మేకర్ల కోసం ప్రేక్షకులు ఎదురుచూస్తున్నారు. ఈ క్రమం లోనే సరికొత్త పాయింట్తో వస్తోంది ‘త్రిబాణధారి బార్బరిక్’ చిత్రం. భీముడి మనవడు, ఘటోత్కచుడి కొడుకే బార్బరీకుడి కథ ఆధారంగా రూపొందుతున్న ఈ సినిమాపై మొదట్నుంచీ భారీ అంచనాలున్నాయి.
స్టార్ డైరెక్టర్ మారుతి సమర్పకుడిగా విజయపాల్రెడ్డి అడిదల నిర్మిస్తున్న ఈ మైథలాజికల్ థ్రిల్లర్ మూవీకి మోహన్ శ్రీవత్స దర్శకత్వం వహిస్తున్నారు. వానర సెల్యూలాయిడ్ బ్యానర్పై తెరకెక్కిస్తున్న ఈ చిత్రంలో సత్యరాజ్, వశిష్ట ఎన్ సింహ, సాంచి రాయ్, ఉదయభాను, సత్యం రాజేశ్, క్రాంతికిరణ్ ముఖ్య పాత్రలను పోషిస్తున్నారు. ఇప్పటికే ఈ చిత్రం నుంచి రిలీజ్ చేసిన పోస్టర్లు, మోషన్ పోస్టర్, గ్లింప్స్, టీజర్ ఇలా అన్నీ కూడా ప్రేక్షకుల్లో ఆసక్తిని పెంచాయి.
సత్యరాజ్, వశిష్ట, సత్యం రాజేశ్.. ఇలా ప్రతి ఒక్కరి పాత్రలకూ ఎంత ప్రాముఖ్యత ఉందో ఇప్పటికే విడుదలైన టీజర్ ద్వారా తెలిసింది. మరీ ముఖ్యంగా సత్యరాజ్ కనిపించిన తీరు, డిఫరెంట్ లుక్స్, నటించిన విధానం ఈ సినిమాకు హైలెట్ అయ్యేలా కనిపిస్తోంది. టీజర్లోని విజువల్స్, ఆర్ఆర్, మేకింగ్ స్టాండర్డ్స్ అన్నీ మరోస్థాయిలో ఉన్నాయి.
ఈ చిత్రానికి ఇంఫ్యూజన్ బ్యాండ్ ఇచ్చిన మ్యూజిక్- ఆర్ఆర్, కుశేందర్ రమేశ్రెడ్డి కెమెరా వర్క్, మార్తాండ్ కే వెంకటేశ్ ఎడిటింగ్ ప్రత్యేక ఆకర్షణ కానుంది. ప్రస్తుతం ఈ మూవీ పోస్ట్ ప్రొడక్షన్ కార్యక్రమాలు జరుగుతున్నాయి. త్వరలోనే ఈ చిత్రాన్ని విడుదల చేసేందుకు మేకర్స్ సన్నాహాలు చేస్తున్నారు.