బైంసా (విజయక్రాంతి): ప్రమాదాల నివారణకు రోడ్డు నియమాలపై డ్రైవర్లు పూర్తిస్థాయిలో అవగాహన పెంపొందించుకోవాలని ఎంవిఐ ధూప్ సింగ్ అన్నారు. రోడ్డు భద్రత వారోత్సవాలు ముగింపులో భాగంగా శుక్రవారం బైంసా ఆర్టీసీ డిపోలో డ్రైవర్లకు రోడ్డు నియమాలపై అవగాహన కల్పించారు. రహదారులపై వాహనాల రాకపోకల సంఖ్య నానాటికి పెరుగుతుందన్నారు. ఈ నేపథ్యంలో అదే స్థాయిలో ప్రమాదాలు చోటు చేసుకోవడం దురదృష్టకరమన్నారు. వాటిని నివారించేందుకు డ్రైవర్లు తగు ముందు జాగ్రత్తలు పాటించాల్సిన అవసరం ఉందన్నారు. ముఖ్యంగా మత్తు పదార్థాలు తీసుకొని, ఫోన్లో మాట్లాడుతూ వాహనాలు నడపవద్దన్నారు. డిపో మేనేజర్ హరిప్రసాద్ తో కలిసి ఉత్తమ డ్రైవర్లు పివి రావు మల్లికార్జున్లకు ప్రశంస పత్రాలు అందజేశారు.