బ్రిడ్జ్‌టౌన్: టీ20 ప్రపంచకప్‌లో ఆస్ట్రేలియా జోరు కొనసాగిస్తోంది. తొలి మ్యాచ్‌లో ఒమాన్‌పై సునాయాస విజయం సాధించిన కంగారూలు.. రెండో మ్యాచ్‌లో డిఫెండింగ్ చాంపియన్ ఇంగ్లండ్‌ను చిత్తుచేశారు. గ్రూప్ భాగంగా శనివారం అర్ధరాత్రి దాటాక ముగిసిన మ్యాచ్‌లో ఆస్ట్రేలియా 36 పరుగుల తేడాతో ఇంగ్లండ్‌ను చిత్తుచేసింది. మొదట సీస్ 20 ఓవర్లలో 7 వికెట్ల నష్టానికి 201 పరుగులు చేసింది. డేవిడ్ వార్నర్ (39; 2 ఫోర్లు, 4 సిక్సర్లు), ట్రావిస్ హెడ్ (34; 2 ఫోర్లు, 3 సిక్సర్లు), కెప్టెన్ మిషెల్ మార్ష్ (35; 2 ఫోర్లు, 2 సిక్సర్లు), స్టొయినిస్ (30; 2 ఫోర్లు, 2 సిక్సర్లు) తలో చేయి వేయడంతో ఆసీస్ మంచి స్కోరు చేయగలిగింది.

ఇంగ్లండ్ బౌలర్లలో క్రిస్ జోర్డాన్ రెండు వికెట్లు పడగొట్టాడు. అనంతరం లక్ష్యఛేదనలో ఇంగ్లండ్ 20 ఓవర్లలో 6 వికెట్లకు 165 పరుగులకు పరిమితమైంది. జోస్ బట్లర్ (42; 5 ఫోర్లు, 2 సిక్సర్లు), సాల్ట్ (37; 4 ఫోర్లు, 2 సిక్సర్లు) పోరాడినా ఫలితం లేకపోయింది. ఈ ఇద్దరి వికెట్లు తీసిన ఆడమ్ జాంపాకు ‘మ్యాన్ ఆఫ్ ది మ్యాచ్’ అవార్డు దక్కింది.