న్యూఢిల్లీ: ప్రముఖ యోగా గురువు బాబా రామ్‌దేవ్‌(Yoga guru Baba Ramdev)పై కేరళ కోర్టు నాన్‌బెయిలబుల్ అరెస్ట్ వారెంట్(Arrest Warrant) జారీ చేసింది. పతంజలి ఆయుర్వేద మేనేజింగ్ డైరెక్టర్ ఆచార్య బాలకృష్ణపై కూడా వారెంట్ జారీ అయింది. పతంజలి ఆయుర్వేద ఉత్పత్తులకు సంబంధించిన ప్రకటనలు తప్పుదారి పట్టించేలా ఉన్నాయని, తప్పుడు వాదనలు ఉన్నాయని ఆరోపణలపై ఈ కేసు వచ్చింది. కేరళ డ్రగ్ ఇన్‌స్పెక్టర్(Kerala Drug Inspector) ఇద్దరు వ్యక్తులపై కేసు నమోదు చేశారు.

ఇది కోర్టు విచారణకు దారితీసింది. విచారణలో భాగంగా, పాలక్కాడ్ కోర్టు గతంలో బాబా రామ్‌దేవ్(Ramdev Baba), ఆచార్య బాలకృష్ణలకు నోటీసులు జారీ చేసింది. ఫిబ్రవరి 1న విచారణకు వ్యక్తిగతంగా హాజరు కావాలని వారికి సూచించింది. అయితే, వారు శనివారం విచారణకు హాజరుకాకపోవడంతో నాన్ బెయిలబుల్ అరెస్ట్ వారెంట్ జారీ చేయాలని కోర్టు ఆదేశించింది. ఈ కేసులో తదుపరి విచారణ ఫిబ్రవరి 15న జరగనుంది. పతంజలి అనుబంధ సంస్థ దివ్య ఫార్మసీ(Divya Pharmacy)పై ప్రభుత్వం ముందస్తు చర్య తీసుకున్న నేపథ్యంలో ఈ వివాదం ఏర్పడింది. తమ ప్రకటనలు తప్పుదారి పట్టిస్తున్నాయని పేర్కొంటూ అధికారులు ఇప్పటికే పది ఉత్పత్తులను నిషేధించారు. తత్ఫలితంగా, ఈ ఉత్పత్తుల తయారీ లైసెన్స్‌లు రద్దు చేయబడ్డాయి.