బీజేపీ ఎంపీ కొండా విశ్వేశ్వర్‌రెడ్డి 

వినోద్ వర్మ, సూర్య పురిమెట్ల, సాయికుమార్, అనసూయ భరద్వాజ్, శ్రీకాంత్ అయ్యంగార్ కీలక పాత్రల్లో తెరకెక్కుతున్న చిత్రం ‘అరి’. ‘మై నేమ్ ఈజ్ నో బడీ’ అనేది ఉపశీర్షిక. ‘పేపర్ బాయ్’ ఫేమ్ జయశంకర్ వంగ దర్శకత్వం వహిస్తు న్న ఈ సినిమాకు శ్రీనివాస్ రామిరెడ్డి, డాక్టర్ తిమ్మప్ప నాయుడు పురిమెట్ల, శేషు మారంరెడ్డి నిర్మాతలు. ఆర్‌వీ రెడ్డి సమర్పణలో ఆర్వీ సినిమాస్ పతాకంపై రూపొందుతున్న ఈ సినిమా నుంచి ఇప్పటికే విడుదలైన క్యారెక్టర్ లుక్స్, ట్రైలర్, సాంగ్‌కు మంచి స్పందన వచ్చింది.

ప్రస్తుతం అన్ని కార్యక్రమాలు పూర్తి చేసుకుని విడుదలకు సిద్ధమవుతున్న ఈ మూవీలో ఓ ప్రముఖ నిర్మాణ సంస్థ భాగస్వామి కానుంది. సినిమాను త్వరలో థియేట్రికల్ రిలీజ్ చేయబోతున్నారు. ఈ నేపథ్యంలో ఆదివారం మేకర్స్ ఈ సినిమా నుంచి ‘చిన్నారి కిట్టయ్య’ అనే లిరికల్ సాంగ్ మంగ్లీ వెర్షన్‌ను రిలీజ్ చేశారు. అయితే, ఇప్పటికే ఈ పాట విడుదలై సంగీత ప్రియుల ప్రశంసలందుకుంది. తాజాగా అదే పాట మంగ్లీ వెర్షన్‌ను బీజేపీ ఎంపీ కొండా విశ్వేశ్వర్ రెడ్డి చేతుల మీదుగా విడుదల చేయించారు. ఈ సందర్భంగా ఎంపీ విశ్వేశ్వర్ రెడ్డి మాట్లాడుతూ.. “అరి’ సినిమా గురించి వింటున్నాను.

గతంలో ‘పేపర్ బాయ్’ మూవీతో ప్రతిభావంతుడైన దర్శకుడిగా పేరు తెచ్చుకున్న డైరెక్టర్ జయశంకర్ ఈ సినిమాను తెరకెక్కిస్తున్నారని చెప్పారు. ఈ సినిమా కూడా ఆయనకు సక్సెస్ ఇవ్వాలని కోరుకుంటున్నా. ‘చిన్నారి కిట్టయ్య’ పాట మంగ్లీ వెర్షన్ చాలా బాగా వచ్చింది. సినిమా సక్సెస్ అవుతుంది” అని తెలిపారు. సుమన్, ఆమని, శుభలేక సుధాకర్, వైవా హర్ష, శ్రీనివాసరెడ్డి, చమ్మక్ చం ద్ర, సురభి ప్రభావతి, తమిళ బిగ్‌బాస్ ఫేమ్ పావనిరెడ్డి, జెమినీ సురేశ్, ఐ డ్రీమ్ అంజలి తదితరులు ఈ సినిమాలో మిగతా తారాగణం కాగా.. మ్యూజిక్: అనుప్ రూబెన్స్; లిరిక్స్: కాసర్ల శ్యామ్, వనమాలి, కళ్యాణ్ చక్రవర్తి; సినిమాటోగ్రఫీ: కృష్ణప్రసాద్, శివశంకర వరప్రసాద్; ఎగ్జిక్యూటివ్ ప్రొడ్యూసర్: వినయ్.