తిరుపతి: తిరుమల రెండో ఘాట్‌ రోడ్డులో ఏపీఎస్‌ఆర్టీసీ బస్సు(APSRTC Bus) ప్రమాదానికి గురికావడంతో పలువురు ప్రయాణికులు గాయపడ్డారు. బస్సు అదుపు తప్పి రిటైనింగ్ వాల్‌ను ఢీకొట్టడంతో తీవ్ర నష్టం వాటిల్లినట్లు సమాచారం. ప్రాథమిక నివేదికల ప్రకారం, ప్రమాదంలో పది మంది వరకు ప్రయాణికులు గాయపడ్డారు. ఈ ప్రమాదంతో ట్రాఫిక్‌కు తీవ్ర అంతరాయం ఏర్పడింది. రెండు కిలోమీటర్ల మేర వాహనాలు నిలిచిపోవడంతో ట్రాఫిక్‌ నిలిచిపోయింది. రోడ్డును క్లియర్ చేసేందుకు టీటీడీ సిబ్బంది చర్యలు చేపట్టారు. గాయపడిన ప్రయాణికులను ఆస్పత్రికి తరలించారు.

టీటీడీ క్రేన్‌తో బస్సును రోడ్డుపై నుంచి తొలగించి, కొంతసేపటి తర్వాత ట్రాఫిక్‌ను పునరుద్ధరించింది. భారీ పొగమంచు తిరుమలను చుట్టుముట్టింది. రెండో ఘాట్‌ రోడ్డులో ప్రయాణించేటప్పుడు మరింత జాగ్రత్తగా వెళ్లాలని టీటీడీ(TTD) డ్రైవర్లందరికీ హెచ్చరికలు జారీ చేసింది. దట్టమైన పొగమంచు(Fog) కారణంగా ముందు వెళ్తున్న వాహనాలను చూసేందుకు వాహనదారులు ఇబ్బంది పడుతుండడంతో ప్రమాదాలు చోటుచేసుకుంటున్నాయి. ఘాట్ రోడ్లపై అత్యంత జాగ్రత్తగా వాహనాలు నడపాలని టీటీడీ వాహనదారులకు సూచించింది. ప్రహరీ గోడ బలంగా ఉండడంతో పెద్ద ప్రమాదం తప్పిందని, లేకుంటే బస్సు సమీపంలోని లోతైన లోయలో పడిపోయే అవకాశం ఉందని ప్రత్యక్ష సాక్షులు ఆందోళన వ్యక్తం చేశారు.