అమరావతి: దేశంలోనే తొలిసారిగా పర్యాటకంగా సీ ప్లేన్ వినియోగం అందుబాటులోకి వచ్చింది. ఏపీ ముఖ్యమంత్రి నారా చంద్రబాబు నాయుడు విజయవాడలోని పున్నమిఘాట్ లో, ప్రకాశం బ్యారేజ్ నుంచి శ్రీశైలానికి సీప్లేన్ సర్వీసులను లాంఛనంగా శనివారం ప్రారంభించారు. ప్రకాశం బ్యారేజ్ నుంచి శ్రీశైలానికి సీ ప్లేన్ ప్రయాణించనుంది. సీఎం చంద్రబాబు సీ ప్లేన్ లో లోయర్ స్టేషన్ శ్రీశైలానికి చేరుకోనున్నారు. భ్రమరాంబ, మల్లికార్జునస్వామి ఆలయాన్ని చంద్రబాబు సందర్శించనున్నారు. సాయంత్రం సీ ప్లేన్ లోనే పున్నమిఘాట్ కు చేరుకుంటారు.  ఈ కార్యక్రమాన్ని కేంద్ర పౌర విమానయాన మంత్రిత్వ శాఖ, రాష్ట్ర ప్రభుత్వం సంయుక్తంగా నిర్వహించింది. ఈ సందర్బంగా చంద్రబాబు మాట్లాడుతూ... సీ ప్లేన్ ప్రయాణం ఒక వినూత్నమైన ప్రయాణం అన్నారు. రాష్ట్రానికి టూరిజం ఒక వరమని పేర్కొన్నారు. రాష్ట్రాన్ని అభివృద్ధి చేసి, సంపద పెంచి, ఆ సంపద పేదలకు పంచాలి అనేది తమ విధానమని వెల్లడించారు.