డ్రైవర్ మృతి, ఒకరికి గాయాలు

రాజేంద్రనగర్, నవంబర్14: కారు అదుపుతప్పి డ్రైవర్ మృతిచెందిన ఘటన ఆర్‌జీఐఏ పోలీస్ స్టేషన్ పరిధిలో గురువారం ఉదయం జరిగింది. ఇన్‌స్పెక్టర్ బాలరాజు కథనం ప్రకారం.. మహారాష్ట్రకు చెందిన పఠా న్ జబ్బార్ ఖాన్(31) కొన్నేళ్ల క్రితం నగరంలోని మైలార్‌దేవ్‌పల్లికి వలస వచ్చి శ్రాస్త్రిపురంలో ఉంటూ క్యాబ్ నడుపుకుంటూ జీవనం సాగిస్తున్నాడు.

గురువారం ఉదయం జబ్బార్ ఖాన్ కారులో ప్రయాణికులను ఎక్కించుకొని ఎయిర్‌పోర్టుకు వెళ్తున్న క్రమంలో ఆశ్రమ్ కల్వర్టు వద్ద కారు అదుపుతప్పి డివైడర్‌ను ఢీకొట్టింది. ఈప్రమాదంలో తీవ్రంగా గాయపడిన జబ్బార్ ఖాన్ అక్కడికక్కడే మృతిచెందాడు. కారులో ఉన్న మరో వ్యక్తి తీవ్రంగా గాయపడగా ఆస్పత్రికి తరలించారు. మృతుడి బావ అమీర్ రాషెద్ ఫిర్యాదు మేరకు కేసు దర్యాప్తు చేస్తున్నట్లు ఇన్‌స్పెక్టర్ పేర్కొన్నారు.