ముంబై: ముంబై క్రికెట్ అసోసియేషన్ (ఎంసీఏ) అధ్యక్షుడు అమో ల్ కాలే సోమవారం గుండెపోటుతో తుదిశ్వాస విడిచారు. చిరకాల ప్రత్యర్థులు టీమిండియా, పాకిస్థాన్ మ్యాచ్ చూసేందుకు న్యూయార్క్ వెళ్లిన అమోల్ కాలే అక్కడే కార్డియాక్ అరెస్ట్‌కు గురయ్యారని ఎంసీఏ తెలిపింది. ఎంసీఏ సెక్రటరీ అజింక్యా నాయ క్, అపెక్స్ కౌన్సిల్ సభ్యుడు సూరజ్ సమత్‌తో కలిసి అమోల్ కాలే మ్యాచ్‌కు హాజరయ్యారు. ఇక 2022 అక్టోబర్‌లో జరిగిన ఎంసీఏ ఎన్నికల్లో మాజీ క్రికెటర్ సందీప్ పాటిల్ ప్యానెల్‌పై అమోల్ కాలే విజయం సాధించారు. 2023 వన్డే ప్రపంచకప్ వాంఖడే వేదికగా మ్యాచ్‌లు విజయవంతంగా నిర్వహించడంలో అమోల్ కీలకపాత్ర పోషించారు. కాలే హయాంలో ముంబై దేశవాళీ క్రికెట్ మరింత అభివృద్ధి చెందడంతో పాటు 2023 రంజీ ట్రోఫీని ముంబై జట్టు కైవసం చేసుకోవడం విశేషం.