మందమర్రి, (విజయక్రాంతి): పట్టణంలోని మహాత్మ జ్యోతి బాపూలే పాఠశాలలో 9వ తరగతి చదువుతున్న మాసు అక్షర రాష్ట్రస్థాయి బాలికల విభాగం సబ్ జూనియర్ హ్యాండ్ బాల్ పోటీలకు ఎంపికైందని పాఠశాల ప్రిన్సిపాల్ మంజుల తెలిపారు. శుక్రవారం పాఠశాలలో ఏర్పాటు చేసిన కార్యక్రమంలో ఆమె విద్యార్థినిని ప్రత్యేకంగా అభినందించి మాట్లాడారు. సెప్టెంబర్ 9న ఆసిఫాబాద్ లోని గిరిజన సంక్షేమ ఆదర్శ బాలికల క్రీడా పాఠశాలలో నిర్వహించిన జిల్లా స్థాయి హ్యాండ్ బాల్ పోటీల్లో పాల్గొని అత్యంత ప్రతిభ కనబరిచి నవంబర్ 2 నుండి 4వ తేదీ వరకు ఆసిఫాబాద్ లోని గిరిజన ఆదర్శ బాలికల క్రీడా పాఠశాలలో జరగనున్న రాష్ట్ర స్థాయి పోటీలకు ఎంపికైందని రాష్ట్రస్థాయిలో సైతం అత్యుత్తమ ప్రతిభ కనబరిచి జాతీయ స్థాయికి ఎంపికై, పాఠశాలకు జిల్లాకు పేరు తీసుకురావాలని ఆమె ఆకాంక్షించారు. కాగా రాష్ట్రస్థాయి పోటీలకు ఎంపికైన విద్యార్థినిని పిడి విశాల,పిఈటి స్వరూప, ఉపాధ్యాయులు అభినందించారు.ఇదిలా ఉండగా మండలంలోని పాన్నారం గ్రామానికి చెందిన మాసు సావిత్రి - సంతోష్ కుమార్ ల కుమార్తె అక్షర చదువులో రాణిస్తూ మరో వైపు క్రీడల్లో రాణించి రాష్ట్ర స్థాయి బాలికల విభాగం సబ్ జూనియర్ హ్యాండ్ బాల్ పోటీలకు ఎంపిక కావడంతో పలువురు గ్రామస్థులు విద్యార్థినిని అభినందించారు.రాష్ట్ర స్థాయిలో ప్రతిభ కనబరిచి గ్రామ పేరును నిలబెట్టాలని గ్రామస్థులు కోరారు.