కథానాయకుడు విజయ్ రాజకీయాల్లోకి అడుగు పెట్టారు. ఇకపై సినిమాలు చేయరని టాక్ వినిపిస్తోంది. ప్రస్తుతానికి ఒప్పుకున్న సినిమాలను పూర్తి చేసి గుడ్ బై చెప్పేస్తారని తెలుస్తోంది. ప్రస్తుతం హెచ్ వినోద్ దర్శకత్వంలో విజయ్ ఓ సినిమా చేస్తున్నారు. ఇదే ఆయన చివరి సినిమా కూడా కావొచ్చని అంటున్నారు. అయితే ఈ సినిమాలో కథానాయికగా పూజా హెగ్డే నటించనున్నారని సమాచారం.

అలాగే ఈ సినిమాలో ఓ కీలక పాత్ర కోసం సమంతను సంప్రదించారని తెలుస్తోంది. గతంలో విజయ్, సమంత కాంబోలో ‘కత్తి, తేరి, మెర్సల్’ చిత్రాలు వచ్చాయి. అవి మూడు మంచి విజయం సాధించడంతో హ్యాట్రిక్ పెయిర్‌గా నిలిచారు. వీరిద్దరి కాంబో తెరపై కనిపించి ఏడేళ్లవుతోంది. వీరి కాంబో రిపీట్ కాబోతోందంటూ కొన్ని నెలల క్రితం ప్రచారం జరిగింది. కానీ అది జరగలేదు.

ఇప్పుడు ‘విజయ్ 69’లో సమంత నటిస్తున్నారంటూ ప్రచారం జరుగుతోంది. అయితే సమంత ‘సిటడెల్’ విడుదల తర్వాత ఇచ్చిన ఇంటర్వ్యూలో పెద్ద హీరోల సినిమాను చేయాలనుకోవడం లేదని వెల్లడించారు. దీంతో విజయ్‌తో సినిమా ఉంటుందా? లేదా? అనే సందేహం వ్యక్తమవుతోంది. ఈ విషయంపై స్పష్టత రావాలంటే కొద్ది రోజులు ఆగాల్సిందే.