మంచు లక్ష్మి, ఎస్తేర్, శివ కంఠమనేని ప్రధాన పాత్రల్లో నటిస్తున్న చిత్రం ‘ఆదిపర్వం’. ఈ సినిమాలో మరో కీలక పాత్రను ఆదిత్య ఓం పోషిస్తున్నారు. దర్శకుడు సంజీవ్ మేగోటి పీరియాడిక్ ప్రేమకథతో అన్వికా ఆర్ట్స్ పతాకంపై ఏఐ ఎంటర్‌టైన్‌మెంట్స్ కలయికలో తెరకెక్కిస్తున్నారు. ఈ నెల 8న ప్రపంచవ్యాప్తంగా థియేటర్లలో విడుదల కానుందీ సినిమా.

ఈ నేపథ్యంలో చిత్ర దర్శకుడు సంజీవ్ మేగోటి సినిమా విశేషాలను మీడియాతో పంచుకున్నారు. “ఆదిపర్వం’ నా రీఎంట్రీ మూవీ అనుకోవచ్చు. తెలుగు, తమిళం, కన్నడ, మలయాళంలో ఈ నెల 8న ఈ సినిమాను రిలీజ్ చేస్తున్నాం. కడప దగ్గరలోని ఎర్రగుడి నేపథ్యంగా అమ్మవారి సినిమాగా రూపొందించా. 1974-90 మధ్య జరిగిన యధార్థ ఘటనల నేపథ్యంగా సినిమా ఉంటుంది.

అప్పట్లో నిధి నిక్షేపాల కోసం ఆలయాల్లో విగ్రహాలు ధ్వంసం చేసేవారు. ఆ ఘటనలకు ఫిక్షన్ యాడ్ చేసి ఈ చిత్రంలో చూపిస్తున్నా. అమ్మోరు, అరుంధతి చిత్రాల తరహాలో ఉంటుంది. గ్రాఫిక్స్‌కు ప్రాధాన్యత ఇచ్చాం. ఈ మూవీలో హీరోహీరోయిన్ అంటూ ప్రత్యేకంగా ఉండరు. అందరూ కథలో భాగంగా ఉంటారు. దర్శకుడిగా నాకు కన్నడలో మంచి పేరుంది. అక్కడ పబ్లిసిటీ చేయలేదు.

అయినా మా సినిమా కన్నడలో పెద్ద ఎత్తున విడుదలవుతోంది. తెలుగులో ప్రతి ఏరియా నుంచి డబ్బులు కట్టి మరీ సినిమాను డిస్ట్రిబ్యూట్ చేస్తున్నారు. ఇది మా సక్సెస్ అని భావిస్తా. ప్రస్తుతం ‘సర్పయాగం’ అనే సినిమా డైరెక్ట్ చేస్తున్నా. మరో వెబ్‌సిరీస్‌కు సంప్రదింపులు జరుగుతున్నాయి” అని చెప్పారు సంజీవ్ మేగోటి.