కొంతమంది ము ద్దుగుమ్మలకు కాలం వద్దన్నా కలిసొస్తుంది. హిట్ ఫట్‌లతో సంబంధం లేకుండా దూసుకెళుతుంటారు. అలాంటి బ్యూటీల్లో శ్రీలీల ఒకరు. ఈ అమ్మడి తొలి సినిమా ఆశించిన ఫలితాన్నివ్వేలేదు. అయినా సరే.. అవకాశాలు మాత్రం వెదుక్కుంటూ వచ్చాయి. అది కూడా స్టార్ హీరోల సరసన కావడం గమనార్హం. ఇక ఈ ముద్దుగుమ్మ ఇటీవలే అల్లు అర్జున్‌తో కలిసి ఒక యాడ్ చేశారు.

ఇప్పుడు ఏకంగా పుష్ప 2లో ఛాన్స్ కొట్టేశారు. సుకుమార్ దర్శకత్వంలో వచ్చే సినిమాల్లో తప్పక ఓ స్పెషల్ సాంగ్ ఉంటుంది. అది మామూలుగా పేలదు. ‘ఆర్యలో అ అంటే అమలాపురం పాట నుంచి పుష్ఫలో ఊ అంటావా మావ’ వరకూ పాటలన్నీ టపాసుల్లా పేలాయి. ఈ పాటల్లో స్టెప్స్ కూడా అందరినీ ఆకట్టుకున్నాయి. ఇక పుష్ప 2లో కూడా స్పెషల్ సాంగ్ ఉంటుందని ఇప్పటికే ప్రకటించారు.

ఈ పాట విషయమై తొలుత శ్రద్దా కపూర్ పేరు బాగా వినిపించింది. అయితే రెమ్యూనరేషన్ కారణంగా ఆమె సైడ్ అయిపోయారట. ఇప్పుడు చిత్రబృందం శ్రీలీలను సంప్రదించిందంటూ వార్తలు వినవస్తున్నాయి. శ్రీలీల డ్యాన్సులు అద్భుతంగా చేస్తారు. అల్లు అర్జున్ గురించి చెప్పనక్కర్లేదు.

వీరిద్దరూ కలిసి పాటకు స్టెప్పులేస్తే అభిమానులకు అంతకు మించి ఏం కావాలి. మైత్రీ మూవీ మేకర్స్ పతాకంపై ఈ సినిమా రూపొందుతోంది. ఈ చిత్రంలో బన్నీ సరసన హీరోయిన్‌గా రశ్మిక మందన్నా నటిస్తున్నారు. డిసెంబర్ 5న సినిమా ప్రపంచ వ్యాప్తంగా విడుదల కానుంది.