నాని హీరోగా నటిస్తున్న తాజా క్రైమ్ యాక్షన్ థ్రిల్లర్ ‘హిట్3: ది థర్డ్ కేస్’. ఈ చిత్రంలో శ్రీనిధిశెట్టి హీరోయిన్‌గా నటించింది. డాక్టర్ శైలేశ్ కొలను దర్శకత్వం వహించిన ఈ చిత్రాన్ని వాల్ పోస్టర్ సినిమా, నాని యూనానిమస్ ప్రొడక్షన్స్ బ్యానర్లపై ప్రశాంతి తిపిర్నేని నిర్మించారు. ఈ మూవీ మే 1న పాన్ ఇండియాగా విడుదల కానుంది. ఈ సందర్భంగా హీరోయిన్ శ్రీనిధిశెట్టి చిత్ర విశేషాలను పంచుకున్నారు.

ఈ సినిమాలో మీ క్యారెక్టరైజేషన్ ఎలా ఉండబోతుంది?

ఇందులో మృదుల అనే పాత్రలో కనిపిస్తాను. అర్జున్ సర్కార్  క్యారెక్టర్‌లో వైలెన్స్‌తోపాటు చాలా యాంగిల్స్ ఉంటాయి. ఆ పాత్రకు భిన్నంగా ఉండే క్యారెక్టర్ మృదుల. అర్జున్ సర్కార్, మృదుల మాట తప్పితే ఇంకెవరి మాట కేర్ చేయరు. మృదుల స్వతంత్రమైన భావాలున్న వ్యక్తి. ఆ క్యారెక్టర్‌లో కొన్ని లేయర్స్ ఉన్నాయి. చాలా ఇంట్రెస్టింగ్ క్యారెక్టర్ అది.  

ఈ కథలో మీ పాత్రకు ఎలాంటి ప్రాధాన్యత ఉంటుంది?

నిజానికి ఇన్వెస్టిగేటివ్ క్రైమ్ థ్రిల్లర్స్‌లో హీరోయిన్ పాత్రకు అంత ప్రాధాన్యత ఉండదు. కానీ శైలేష్ కొలను బ్రిలియంట్ రైటర్. మీరు హిట్, హిట్2 సినిమాలు గమనిస్తే ఒక్కో సినిమాకు హీరోయిన్ క్యారెక్టర్జేషన్‌లో చాలా ఇంపార్టెన్స్ పెరిగి ఉంటుంది. కథలో హీరోయిన్ క్యారెక్టర్ కూడా బ్లెండ్ అయి ఉంటుంది. ‘హిట్3’లో కూడా హీరోయిన్ క్యారెక్టర్‌ను ఇంకా బెటర్ చేశారు. కథలో చాలా మంచి కనెక్షన్ ఉంటుంది.  

నానితో పనిచేయడం ఎలా అనిపించింది?

నాని సినిమాలన్నీ చూశాను. సహజమైన నటుడు. చాలా గ్రౌండెడ్‌గా ఉంటారు. ఆయనతో పని చేయడం చాలా అద్భుతమైన అనుభూతిని పొందాను. చాలా కంఫర్ట్ ఇచ్చారు. అలాంటి కంఫర్ట్ జోన్ ఇస్తే పెర్ఫార్మన్స్ కూడా చాలా అద్భుతంగా ఉంటుంది.

ఈ సినిమాకు మీరే డబ్బింగ్ చెప్పారని విన్నాం?  

అవును. చాలా ఇష్టంగా నా పాత్రకు నేనే డబ్బింగ్ చెప్పాను. ఆల్రెడీ నా క్యారెక్టర్ కోసం ఒక డబ్బింగ్ ఆర్టిస్ట్‌తో డబ్బింగ్ చెప్పించారు. అయితే నా పాత్రకు నేనే డబ్బింగ్ చేస్తానని డైరెక్టర్‌ను నేను రిక్వెస్ట్ చేశాను. నా వాయిస్ డైరెక్టర్‌కు నచ్చింది. నేను చేసిన ఫస్ట్ తెలుగు సినిమాకు నా వాయిస్ ఉండడం చాలా ఆనందంగా అనిపించింది. ఓ కన్నడ అమ్మాయిలా కాకుండా తెలుగు అమ్మాయిలానే డబ్బింగ్ చెప్పాను.

మీ తొలి తెలుగు సినిమాకు ఏ సర్టిఫికెట్ రావడం ఎలా అనిపిస్తుంది?

నేను కథవిన్నప్పుడే చాలా వైలెన్స్ యాక్షన్ ఉందనిపించింది. నిజానికి ఈ స్టోరీకి అలాంటి వైలెన్స్ యాక్షన్ కావాలి. ఈ సినిమా జోనర్ అలాంటిది.- కేజీఎఫ్‌లో కూడా వైలెన్స్ ఉంది. అయితే అది డిఫరెంట్ వరల్డ్. హిట్3  డిఫరెంట్ వరల్డ్. -నేను దాదాపు వైలెన్స్ ఉన్న సినిమాలే చేశాను. కేజీఎఫ్ డైలాగ్‌లో చెప్పినట్టు ‘వైలెన్స్ ఐ డోంట్ లైక్, బట్ వైలెన్స్ లైక్స్ మీ (నవ్వుతూ).  

డైరెక్టర్ శైలేశ్ కొలను గురించి?

ఇలాంటి ఇన్వెస్టిగేషన్ థ్రిల్లర్ యాక్షన్ డ్రామా చేయడం నాకు ఫస్ట్ టైమ్. డైరెక్టర్ చాలా సపోర్ట్ చేశారు. ప్రతిదీ వివరంగా వివరించేవారు. నాకు అన్నీ నేర్పించారు. ఆయన చాలా మంచి ప్లానింగ్‌తో షూట్ చేస్తారు. మిగతా టెక్నికల్ టీమ్ కూడా ది బెస్ట్ వర్క్ ఇచ్చారు. 

‘కేజీఎఫ్3’లో మీరు కనిపిస్తారా?

కేజీఎఫ్3లో నేను ఉన్నానా.. లేదా? అనేది వెయిట్ అండ్ వాచ్ (నవ్వుతూ). 

‘రామాయణ’లో సీత క్యారెక్టర్‌ను రిజెక్ట్ చేశారట? 

నిజానికి ఈ విషయంలో మీకు వివరణ ఇవ్వాలి. మీడియాలో దీనిపై మిస్ కమ్యూనికేషన్ ఉంది. నేను సీత క్యారెక్టర్ కోసం ఆడిషన్ ఇచ్చాను. అదొక్కటే నిజం. ఆ తర్వాత వాళ్లనుంచి నాకు ఎలాంటి కాల్ రాలేదు. అసలు అలాంటి క్యారెక్టర్‌ను రిజెక్ట్ చేసే అంత పెద్ద యాక్టర్‌ను కాదు నేను. నేను ఆడిషన్ ఇచ్చిన మాట మాత్రమే వాస్తవమే. ఆ పాత్రకు ఫైనల్‌గా సాయిపల్లవిని ఎంపిక చేశారని మీడియా ద్వారానే తెలుసుకున్నాను.      

కొత్తగా చేస్తున్న సినిమాలు..?

తెలుసు కదా సినిమా షూటింగ్ జరుగుతోంది.