సినీ ఇండస్ట్రీలో పదేళ్లుగా ప్రయాణిస్తున్న తాను చాలా విషయాలు నేర్చుకున్నానని చెప్పింది అందాల నటి హెబ్బా పటేల్. మరో 10 ఏళ్లు నటిగా ప్రయాణిస్తానని నమ్మకం ఉందని తెలిపింది. జయాపజయాలేవీ శాశ్వతం కాదని, పనిచేసుకుంటూ వెళ్లడమే మన చేతిలో ఉంటుందని చెప్పుకొచ్చింది. 

అశోక్‌తేజ దర్శకత్వంలో మధు క్రియేషన్స్, సంపత్ నంది టీమ్‌వర్క్స్ పతాకంపై డీ మధు నిర్మిస్తున్న చిత్రం ‘ఓదెల2’. ఇందులో తమన్నా నాగసాధువు పాత్రలో కనిపించనునండగా.. హెబ్బా పటేల్, వశిష్ట ఎన్ సింహ ముఖ్య పాత్రలు పోషిస్తున్నారు. ఈ సినిమా ఏప్రిల్ 17న థియేటర్లలో విడుదల కానుంది. ఈ సందర్భంగా హెబ్బాపటేల్ విలేకరులతో చిత్ర విశేషాలనను పంచుకున్నారు. ఈ సందర్భంగా తన కెరీర్ గురించి కూడా పలు ఆసక్తికర విషయాలను తెలియజేశారు. ఆ విశేషాల సమాహారం హెబ్బా మాటల్లోనే... 

‘-ఓదెల రైల్వేస్టేషన్’ లాక్‌డౌన్ టైమ్‌లో చేసిన సినిమా. కరోనా కారణంగా షూటింగులన్నీ ఆగిపోయాయి. సంపత్ నంది టీమ్ మాత్రం ధైర్యంగా ముందుకువచ్చి సినిమా చేశారు. ఒక చిన్న ప్రయత్నంగా మొదలుపెట్టిన సినిమా ఘన విజయాన్ని అందుకోవడం అద్భుతం. మళ్లీ ఇప్పుడు ఇంత గొప్ప స్థాయిలో సీక్వెల్‌ను తీసుకురావడం చాలా ఆనందంగా ఉంది. ‘-ఓదెల1’ అవుట్‌అండ్‌అవుట్ మర్డర్ మిస్టరీ. ‘ఓదెల2’ సూపర్ నేచురల్ థ్రిల్లర్. ఇందులో చాలా అద్భుతమైన అంశాలుంటాయి. 

ఇందులో తమన్నాతో నాకు కాంబినేషన్ సీన్స్ ఉన్నాయి. ఆమె నా సోదరి పాత్రలో కనిపిస్తారు. నేను ఎక్కువ శాతం జైలు ఎపిసోడ్స్‌లో కనిపిస్తా. మొదటి భాగంపై నా పాత్ర ఎంత ప్రభావం చూపించిందో ఈ రెండో భాగంలోనూ అంతే ప్రభావవంతంగా ఉంటుంది. తమన్నా ప్రతి పాత్రనూ సీరియస్‌గా తీసుకుంటారు. ఒక క్యారెక్టర్ కోసం ఆమె సిద్ధమయ్యేవిధానం నాకు చాలా నచ్చింది. ‘ఓదెల2’ కోసం చాలా అద్భుతంగా ప్రిపేర్ అయ్యారు. తొలి భాగం అప్పుడు నేను ప్రత్యేకంగా ఏమీ సిద్ధం కాలేదు. తమన్నాలా హోమ్‌వర్క్ చేయలేదు. భవిష్యత్తులో అలా కష్టపడాలనే విషయాన్నైతే తెలుసుకున్నా.

‘-కుమారి 21ఎఫ్’ సినిమా నాకు ప్రేక్షకాదరణను తెచ్చిపెట్టింది. ఈ ‘ఓదెల’ నన్ను గొప్ప నటిగా నిలబెడుతుంది. ఇంకా ముఖ్యంగా నేను అన్ని రకాల పాత్రలు చేయగలననే నమ్మకాన్ని కల్పించింది. నటిగా ఈ సినిమా నుంచి చాలా విషయాలు నేర్చుకున్నా.

-సంపత్ విజనరీ ఫిలిం మేకర్. తొలి భాగంలో నా పాత్ర గురించి చెప్పినప్పుడు నాకే షాకింగ్ అనిపించింది. అంతటి పర్ఫార్మెన్స్ బేస్డ్ క్యారెక్టర్ నేను చేయగలనా? అనిపించింది. అయితే, ఆయన నాకు ప్రయత్నించమని చెప్పారు. ఆయన నమ్మకం నాకు మరింత కాన్ఫిడెన్స్ ఇచ్చింది. అశోక్‌తేజ చాలా క్లారిటీతో ఉంటారు. సంపత్ నంది, అశోక్‌తేజ మంచి టీమ్‌వర్క్ చేస్తారు. నిర్మాత మధు వల్లే ఈ ప్రాజెక్టు మరో స్థాయికి వెళ్లింది.  

-ఈ సినిమా ముహూర్తాన్ని కాశీలో చేశాం. అలాగే టీజర్‌ను మహా కుంభమేళాలో లాంచ్ చేశాం. ఈ కథ ఆధ్యాత్మికత, దైవభక్తితో ముడిపడి ఉంటుంది. ఆ దైవశక్తి మాకు విజయాన్ని అందిస్తుందని భావిస్తున్నాం.

ఇండస్ట్రీలో పదేళ్లు పూర్తి చేసుకున్నాను. ఎన్నో -అప్స్ అండ్ డౌన్స్‌తో ఈ ప్రయాణం ఆనందంగానే అనిపించింది. నటిగా నేనెప్పుడూ సంతోషంగానే ఉంటాను. జయాపజయాలేవీ శాశ్వతం కాదు. పనిచేసుకుంటూ వెళ్లడమే మన చేతిలో ఉంది. ఈ జర్నీలో చాలా విషయాలు నేర్చుకున్నా. మరో 10 ఏళ్లు నటిగా ప్రయాణిస్తానని నమ్మకం ఉంది.

-ఇప్పటివరకు చాలా జోనర్స్ సినిమాలు ట్రై చేశాను. ఒక పూర్తిస్థాయి కామెడీ ఎంటర్‌టైనర్ చేయాలనుంది. ప్రస్తుతం -తెలుగులో రెండు సినిమాలు విడుదలకు సిద్ధమవుతున్నాయి. మరో కన్నడ సినిమా చేస్తున్నా. అది వచ్చే నెల ప్రారంభం కానుంది.