నందమూరి కళ్యాణ్ రామ్ యాక్షన్ ప్యాక్డ్ ఎంటర్‌టైనర్‌తో అలరించేందుకు సిద్ధమవుతున్నాడు. మేకింగ్ టైటిల్ ‘ఎన్‌కేఆర్21’తో ప్రచారంలో ఉన్న ఈ చిత్రాన్ని ప్రదీప్ చిలుకూరి దర్శకత్వంలో అశోక్ వర్ధన్ ముప్పా, సునీల్ బలుసు నిర్మిస్తున్నారు. ఇందులో విజయశాంతి ఐపీఎస్ ఆఫీసర్ పాత్రలో నటిస్తుండగా, సోహైల్ ఖాన్, సాయి మంజ్రేకర్, శ్రీకాంత్ కీలక పాత్రల్లో కనిపించనున్నారు. అయితే, ఈ సినిమా ప్రస్తుతం శరవేగంగా షూటింగ్ జరుపుకొంటోంది. ప్రస్తుతం మూవీ టీమ్ యాక్షన్ ఎపిసోడ్‌ను షూట్ చేస్తోంది.

15 రోజుల పాటు కొనసాగనున్న ఈ షూటింగ్ షెడ్యూల్‌లో 150 మంది ఫైటర్లు, 300 మంది జూనియర్ ఆర్టిస్టులు పాల్గొంటున్నారు. ఈ ఫైట్ సీక్వెన్స్ సినిమాకు మేజర్ హైలైట్‌గా నిలుస్తుందని మేకర్స్ చెబుతున్నారు. ఈ యాక్షన్ బ్లాక్‌ను ఇండియన్ టాప్ స్టంట్ డైరెక్టర్ పీటర్ హెయిన్ మాస్టర్ పర్యవేక్షిస్తున్నారు. ఆయన నటీనటులకు సలహాలిస్తూ కనిపించిన వర్కింగ్ స్టిల్స్ సోషల్ మీడియాలో వైరల్‌గా మారాయి.

ఈ సినిమాకు బ్యానర్స్: అశోక క్రియేషన్స్, ఎన్టీఆర్ ఆర్ట్స్; సమర్పణ: ముప్పా వెంకయ్య చౌదరి; ఆర్ట్ డైరెక్టర్: బ్రహ్మ కడలి; యాక్షన్: రామకృష్ణ; డీవోపీ: రామ్ ప్రసాద్; మ్యూజిక్: అజనీష్ లోక్‌నాథ్; ఎడిటర్: తమ్మిరాజు; స్క్రీన్ ప్లే: శ్రీకాంత్ విస్సా; నిర్మాతలు: అశోక్ వర్ధన్ ముప్పా, సునీల్ బలుసు; రచన, దర్శకత్వం: ప్రదీప్ చిలుకూరి.