దిలీప్ ప్రకాశ్, రెజీనా కసాండ్రా లీడ్ రోల్స్‌లో అర్జున్‌సాయి రచన, దర్శకత్వం వహించిన తెలుగు డ్రామా ‘ఉత్సవం’. హార్న్‌బిల్ పిక్చర్స్ పతాకంపై సురేశ్ పాటిల్ ఈ చిత్రాన్ని నిర్మిస్తున్నారు. ప్రకాశ్‌రాజ్, నాజర్, రాజేంద్రప్రసాద్, బ్రహ్మానందం కీలక పాత్రలు పోషిస్తున్నారు. సెప్టెంబర్ 13న సినిమా ప్రేక్షుకుల ముందుకు వస్తోంది. ఈ నేపథ్యంలో మూవీ టీమ్ హైదరాబాద్‌లో ప్రీరిలీజ్ ఈవెంట్ నిర్వహించింది. ముఖ్య అతిథిగా హాజరైన డైరెక్టర్ అనిల్ రావిపూడి మాట్లాడుతూ.. “నాటకం అమ్మలాంటింది. సినిమా ఆ అమ్మ నుంచి జన్మ తీసుకున్న బిడ్డలాంటింది.

నాటకరంగం నుంచి ఇప్పటికీ చాలా మంది నటులు సినిమాలకు వస్తున్నారు. రంగస్థలాన్ని నేపథ్యంగా ఎంచుకొని ‘ఉత్సవం’ సినిమాను చాలా కష్టపడి చేశారు. ‘ఉత్సవం’ మంచి విజయోత్సవం జరుపుకోవాలని కోరుంటున్నా” అన్నారు. బ్రహ్మానందం మాట్లాడుతూ.. ‘నాటకం గురించి డైరెక్టర్ అర్జున్ సాయికి ఉన్న తపన అద్భుతం. నాటక రంగాన్ని బతికించాలనే ఉద్దేశంతోనే ఈ సినిమాలో నటించా’ అని తెలిపారు. డిస్ట్రిబ్యూటర్ శశిధర్ రెడ్డి, మ్యూజిక్ డైరెక్టర్ అనూప్ రూబెన్స్, రైటర్ రమణ గోపిశెట్టి, లిరిక్ రైటర్ అనంత శ్రీరామ్, చిత్రబృందం కార్యక్రమంలో పాల్గొన్నారు.