ఊరిలో నేరస్తులను శిక్షించేందుకు ఓ అపరిచిత వ్యక్తి విష్ణుమూర్తి దశావతారాల రూపంలో వస్తుండటం చూస్తే ధర్మం నశించి, అధర్మం పెరిగినప్పుడు తాను మళ్లీ పుడతానని, ధర్మాన్ని స్థాపిస్తానని శ్రీకృష్ణుడు భగవద్గీతలో చెప్పిన మాటలు గుర్తుకొస్తాయి. మరి ఆ వ్యక్తి ఎవరు? ఈ హత్యలు ఎందుకు చేస్తున్నాడు? అనే కోణంలో పోలీసుల ఇన్వెస్టిగేషన్ మొదలవుతుంది. ఈ విచారణలో పోలీస్ ఆఫీసర్‌కు ఎదురైన ఘటనలు ఏంటి? అనే అంశాలతో ఉన్న ట్రైలర్ ఆద్యంతం ఆసక్తికరంగా సాగుతోంది.

మైథాలజీ టచ్‌తో ఇన్వెస్టిగేటివ్ క్రైమ్ థ్రిల్లర్‌గా రూపొందిన ‘హరికథ’ వెబ్ సిరీస్‌కు చెందిందే ఆ ట్రైలర్. ప్రముఖ ఓటీటీ ప్లాట్‌ఫాం డిస్నీ ఫ్లస్ హాట్ స్టార్‌లో డిసెంబర్ 13 నుంచి స్ట్రీమింగ్ కాబోతోందీ సిరీస్. ఈ నేపథ్యంలో మేకర్స్ ట్రైలర్‌ను విడుదల చేశారు. మ్యాగీ దర్శకత్వంలో ఈ సిరీస్‌ను పీపుల్ మీడియా ఫ్యాక్టరీ బ్యానర్‌పై టీజీ విశ్వప్రసాద్ నిర్మిస్తు న్నారు. నాటకాల్లో దేవుడి పాత్రలు పోషించే వ్యక్తిగా రాజేంద్రప్రసాద్ కనిపించగా, పోలీస్ ఆఫీసర్‌గా శ్రీరామ్ నటించారు. దివి ఓ ప్రధాన పాత్రను పోషిస్తోంది. ఇంకా పూజిత పొన్నాడ, మౌనికరెడ్డి, అర్జున్ అంబటి, రుచిర సాధినేని, శ్రియా కొట్టం, ఉషశ్రీ తదితరులు కీలక పాత్రల్లో నటిస్తున్నారు.