చేతన్‌కృష్ణ, హెబ్బా పటేల్ హీరోహీరోయిన్లుగా నటిస్తున్న సినిమా ‘ధూంధాం’. సాయికుమార్, వెన్నెలకిషోర్, పృథ్వీరాజ్, గోపరాజు రమణ కీలక పాత్రలు పోషిస్తున్నారు. సాయికిషోర్ మచ్చా దర్శకత్వం వహిస్తున్న ఈ చిత్రానికి గోపీమోహన్ స్టోరీ, స్క్రీన్‌ప్లే అందిస్తున్నారు. ఎంఎస్ రామ్‌కుమార్ నిర్మిస్తున్నారు. నవంబర్ 8న ఈ సినిమా థియేటర్ల ద్వారా విడుదల కానుంది.

ఈ నేపథ్యంలో బుధవారం హీరో చేతన్‌కృష్ణ మీడియాతో చిత్ర విశేషాలను పంచుకున్నారు. “సకుటుంబంగా ఎంజాయ్ చేసేలా స్క్రిప్ట్స్ ఇస్తారు గోపీమోహన్. అలాంటి మూవీ నేనూ చేయాలనుకున్నా. ఇప్పుడు నడుస్తున్న థ్రిల్లర్స్ ట్రెండ్‌కు భిన్నం గా ఉందనే ‘ధూంధాం’ చేశా.

తండ్రి కోసం కొడుకు, కొడుకు కోసం తండ్రి ఎక్కడిదాకైనా వెళ్తారనే కాన్సెప్ట్‌తో ఈ సినిమాను రూపొందించాం. మా మూవీలో ఫాదర్ తన కొడుకు అన్నింట్లో ది బెస్ట్‌గా ఉండాలనుకుంటాడు. ఆ గారాబంతో కొడుకు మరింత అల్లరిగా తయారవుతాడు. తన వల్ల ఒక అమ్మాయి జీవితంలో ఏర్పడిన సమస్యకు తనే పరిష్కారం చూపించాలని ప్రయత్నం చేస్తాడు.

-మూవీలో చాలా మంది పేరున్న ఆర్టిస్టులున్నారు. వారితో నటించడానికి బాగా ప్రిపేర్ అయ్యేవాడ్ని. వెన్నెల కిషోర్ టైమింగ్ పట్టుకోవడం కష్టమైంది. హెబ్బా పటేల్‌తో కలిసి నటించడం హ్యాపీగా ఉంది” అని చెప్పారు చేతన్‌కృష్ణ.