24న డాక్టర్ వీపీజీ రాజు ఆధ్యాత్మిక అవార్డు  ప్రదానం

హైదరాబాద్ సిటీబ్యూరో, నవంబర్ 22 (విజయక్రాంతి): అమరావతి-ఆంధ్ర సారస్వత పరిషత్, మాన్సాస్ ట్రస్ట్ ఆధ్వర్యంలో ఈ నెల 24న విశాఖపట్నం ఆంధ్ర విశ్వవిద్యాలయంలోని డాక్టర్ వైఎస్‌ఆర్ మూర్తి ఆడిటోరియంలో డాక్టర్ పీవీజీ రాజు శతజయంతి ఉత్సవాలు నిర్వహించనున్నట్లు పరిషత్ అధ్యక్షుడు డాక్టర్ గజల్ శ్రీనివాస్, మాన్సాస్ కార్యదర్శి డాక్టర్ కేవీ లక్ష్మీపతి రాజు తెలిపారు.

ఈ సందర్భంగా ట్రావన్‌కోర్ మహారాణి, కవయిత్రి, పద్మశ్రీ పురస్కార గ్రహీత డాక్టర్ అశ్వతి తిరుణల్ గౌరీ లక్ష్మీబాయికి డాక్టర్ పీవీజీ రాజు ఆధ్యాత్మిక పురస్కారాన్ని ప్రదానం చేయనున్నట్లు పేర్కొన్నారు.

కార్యక్రమానికి ముఖ్యఅతిథిగా వారణాసి శ్రీకాశీ విశ్వనాథ్ దేవాలయ ట్రస్టీ డాక్టర్ బ్రిజ్ భూషణ్ ఓఝా, గౌరవ అతిథులుగా కేంద్ర మాజీ మంత్రి అశోక్ గజపతిరాజు, ఏపీ హైకోర్టు న్యాయమూర్తి జస్టిస్ డీవీఎస్‌ఎస్ సోమయాజులు, సభాధ్యక్షులుగా ఆంధ్ర సారస్వత పరిషత్ అధ్యక్షుడు డాక్టర్ గజల్ శ్రీనివాస్ పాల్గొంటారని ఆంధ్ర సారస్వత పరిషత్ మూడో ప్రపంచ తెలుగు మహాసభల ముఖ్య సంచాలకులు పీ రామచంద్రరాజు, పరిషత్ కార్యదర్శి రెడ్డప్ప ధవేజి తెలిపారు.