బాలీవుడ్ నటి సన్నీ లియోన్ గురించి ప్రత్యేకంగా చెప్పాల్సిన పనిలేదు. కామెడీ, హారర్ లాంటి అన్ని జానర్లలో నటిస్తూ ప్రేక్షకులను ఆకట్టుకుంటోందీ ముద్దుగుమ్మ. ‘కరెంట్ తీగ’ సినిమాతో తెలుగులోనూ మంచి గుర్తింపు తెచ్చుకున్న ఈ భామ మరోసారి భయపట్టేందుకు ఇంకో తాజా చిత్రంతో తెలుగు ప్రేక్షకుల ముందుకు వస్తోంది. ‘మందిర’ పేరుతో రూపొందిన ఈ సినిమాలో సన్నీలియోన్ ప్రధాన పాత్రలో నటించింది.

దయ్యం రూపంలో, మందిరారాణిగా పవర్‌ఫుల్ రోల్‌లో కనిపించనుంది. తన బలంతోపాటు అందచందాలతో రాజులను ఓడించే రాణిగా డిఫరెంట్ వేరియేషన్స్‌తో కూడిన క్యారెక్టర్‌లో మెప్పించనుంది. ఈ చిత్రం రిలీజ్ డేట్ ఫిక్సయింది. నవంబర్ 22న థియేటర్లలో ఈ సినిమాను విడుదల చేయబోతున్నట్టు మేకర్స్ ప్రకటించారు. తమిళ మూవీ ‘ఓ మై ఘోస్ట్’కు డబ్బింగ్ వెర్షన్‌గా ఈ చిత్రాన్ని తెలుగు ప్రేక్షకుల ముందుకు తెస్తున్నారు.

రొమాంటిక్ హారర్ కామెడీ కథాంశంతో తెరకెక్కిన ఈ సినిమాలో సతీశ్, యోగిబాబు కీలక పాత్రలు పోషించగా, ఆర్ యువన్ దర్శకత్వం వహించారు. ఈ సినిమాకు జావెద్ రియాజ్ సంగీతం అందించగా, దీపక్ డీ మీనన్ కెమెరామెన్‌గా పనిచేశారు. విజన్ మూవీ మేకర్స్ బ్యానర్‌పై సాయి సుధాకర్ కొమ్మలపాటి ఈ చిత్రాన్ని నిర్మించారు.