మునుపెన్నడూ చూడని నాగ సాధువు పాత్రలో అబ్బురపర్చడానికి సిద్ధమవుతోంది కథానాయిక తమన్నా భాటియా. 2021 బ్లాక్‌బస్టర్ హిట్ ‘ఓదెల రైల్వేస్టేషన్’కు సీక్వెల్‌గా వస్తోంది ‘ఓదెల2’. అశోక్ తేజ దర్శకత్వం వహిస్తున్న ఈ చిత్రంలో తమన్నా ముఖ్య పాత్రలో నటిస్తోంది. మధు క్రియేషన్స్, సంపత్ నంది టీమ్‌వర్క్స్ బ్యానర్లలో డీ మధు నిర్మిస్తున్నారు. 

ఈ చిత్రంలో ప్రధాన ప్రతి నాయకుడిగా నటిస్తున్న వశిష్ట ఎన్ సింహ పాత్రను తిరుపతిగా పరిచయం చేస్తూ మేకర్స్ శనివారం ఫస్ట్‌లుక్ పోస్టర్‌ను విడుదల చేశారు. ఈ డివైన్ యాక్షన్ థ్రిల్లర్‌లో వశిష్ట భయంకరమైన రాక్షస పాత్రలో కనిపించబోతున్నారు. ‘ఓదెల పీడకల’ అని రాసి ఉన్న ఫస్ట్‌లుక్ పోస్టర్‌లో అతని ముఖం పాక్షికంగానే కనిపిస్తోంది.

ఇంకా ఈ చిత్రంలో హెబ్బా పటేల్, యువ, నాగ మహేశ్, వంశీ, గగన్ విహారి, సురేందర్‌రెడ్డి, భూపాల్, పూజారెడ్డి తదితరులు ముఖ్య పాత్రలు పోషిస్తున్నారు. సంగీతం: అజనీష్ లోక్‌నాథ్; డీవోపీ: సౌందర్‌రాజన్; ఆర్ట్ డైరెక్టర్: రాజీవ్ నాయర్.